बिहानदेखि सम्पर्कविहीन गण्डकी बोर्डिङ स्कुलमा कक्षा ८ मा अध्ययनरत १३ वर्षीय समर्पण गौतम पाेखरामै फेला परेका छन् । स्कूल निस्केका उनी पोखरा महानगरपालिका वडा नं. २ बरपाटनस्थित विन्ध्यवासिनी विद्यालय नजिकै फेला परेका हुन्।

वर्षाकाे समयमा छाता ओढेर हिँडिरहेको अवस्थामा फेला पारिएको परिवारले जनाएका छन्। बिहान साढे नौ बजे स्कूल हिँडेका समर्पण बेपत्ता रहेको समाचार सामाजिक संजाल र विभिन्न संचारमाध्यममा तस्वीरसहित प्रकाशन भएपछि स्थानियले छाता ओढेर हिँडेको अवस्थामा चिनेर परिवारलाई फाेन गरेर जानकारी दिएका थिए ।

खबर पाउनासाथ त्यहाँ पुगेका उनका मामाले समर्पणलाई सम्झाई बुझाइ गरेर घर फर्काएका थिए। प्रहरीले आवश्यक सोधपुछ गरेर उनका बाबुआमालाई जिम्मा लगाएको जनाइएकाे छ ।

समर्पण स्कूल हिँडेपछि उनको कोठामा हेर्दा आफूलाई पढ्न गाह्रो भएकाले घर छाडेको लेखिएकाे चिट्ठी फेला पारिएकाे थियाे । छोराले त्यस्तो चिट्ठी लेखेको देखेपछि उनका आमाबाबुले छोरा हराएकाले खोजि गरिदिन भन्दै प्रहरी, स्थानीय बासिन्दा र आफ़न्तहरुसँग अनुरोध गरेका थिए।

‘पढ्न गाह्रो भयो’ भन्दै चिठ्ठी लेखेर पोखरामा १३ वर्षीय बालक सम्पर्कविहीन