पोखरा । नवौं राष्ट्रिय खेलकुद प्रतियोगिता अन्तर्गत २०० मिटर दौडमा एपीएफका शिवराज पार्की र लुम्बिनीकी निशा चौधरीले स्वर्णपदक जितेका छन् ।

पोखरा रंगशालामा बिहीबार बिहान भएको प्रतियोगिता शिवराजले निर्धारित दुरी २१ः९१ सेकेण्डमा पूरा गरेर स्वर्णपदक जितेका हुन् ।

शिवराजको यो तेस्रो स्वर्ण हो । यसअघि उनले १०० मिटर र ४ गुणा १०० मिटर रिलेमा पनि स्वर्ण जितेका थिए ।

एपीएफकै आशिष चौधरीले निर्धारित दुरी २२ः०५ सेकेण्डमा पार गरी रजत र त्रिभुवन आर्मी क्लबका युवराज विकले २२ः५० सेकेण्डमा निर्धारित दुरी पार गरी कास्य पदक जिते ।

यस्तै, महिलातर्फको यस स्पर्धामा लुम्बिनीकी निशा चौधरीले निर्धारित दुरी २५ः२४ सेकेण्डमा पूरा गरेर स्वर्ण जितिन् ।

उनले १०० मिटरमा टोकियो ओलम्पिकमा सहभागी जनाएकी त्रिभुवन आर्मीकी सरस्वती चौधरीलाई पछि पारिन् । सरस्वतीले २५ः९५ सेकेण्डमा निर्धारित दुरी पार गरी रजत जितिन् ।

नेपाल पुलिसकी लक्ष्मी साउदले निर्धारित दुरी २६ः५२ सेकेण्डमा पार गरी कास्य जितिन् ।