बाटो रमणीय, उस्तै फराकिलो । सवारी जति हुँइक्यायो, उति मज्जा । तर, ट्राफिक अनुशासन छैन । अनि, परिणाम दुर्घटना ।

अहिले ‘भाइरल रोड’ भनेर चिनिने हेम्जामा दिन बिराएर जसो दुर्घटना हुने गरेका छन् । ‘मानवीय क्षति हुँदा मात्र समाचार बाहिर आउने गरेको छ, नत्र सामान्य दुर्घटना त कति हो कति ?’ – स्थानीय आभाष दाहाल भन्छन् – ‘फराकिलो बाटो देखेर स्पीडमा चलाउँछन् । अनि, मान्छे, गाडीहरु झ्याप्प रोडमा आइपुग्दा ठोक्किहाल्छ । हेम्जा प्रवेश गर्दैगर्दा सावधान भन्नुपर्ने र हेम्जा पार भएपछि बधाई छ पार हुनुभयो भनेर भन्नुपर्ने अवस्था छ ।’

साना सवारी बीचको डिभाइडरबाटै मोड्दा पनि दुर्घटना हुने गरेका छन् । यहाँको दुर्घटनाको मूख्य कारण नै तीब्र गति हो । बाक्लो बस्तीमा रोडमा कतिखेर को आइपुग्छ पत्तै हुन्न । चालक र बटुवाले पनि ट्राफिक नियमको पालना गर्ने हो भने यसरी दुर्घटना हुँदैन ।

कार र स्कुटर ठोक्किँदा आमाछोरा घाइते

पोखरा २५ हेम्जाको सुइखेत स्थित सुन्दरपुरी चोकमा पोखराबाट नौडाँडाँतिर जाँदै गरेको ग ३ च १४५१ नम्बरको प्राइभेट कारले ग १२ प ८४२३ नम्बरको स्कुटरलाई ठक्कर दिई दुर्घटना भयो ।

स्थानीय ३६ वर्षीया बिपना सुवेदीको उक्त स्कुटर कारसँग ठोक्किँदा बिपना सामान्य घाइते भइन् । साथमा रहेका ७ वर्षीय छोरा उमंग गम्भीर घाइते भएको ट्राफिक प्रहरी प्रवक्ता बरिष्ठ नायव निरिक्षक शिवप्रसाद पाठकले जानकारी दिए । उमंगको टाउको र छातीमा चोट लागेको छ ।

घाइते आमाछोरालाई तत्काल फिस्टेल हस्पिटल ल्याइएको प्रहरीले जनाएको छ । बरिष्ठ सई पाठकका अनुसार कारले स्कुटर देखेपछि ५० फिट टाढाबाट ब्रेक हानेको थियो ।

सम्बन्धित समाचारः

हेम्जामा तीव्र गतिको हाइसको ठक्करबाट ७५ वर्षीया वृद्धाको मृत्यु

फराकिलो हेम्जाको सडकमा गाडीकाे ओभर स्पीड, जेब्रा क्रसमै लिन्छन् ज्यान