दाङ । खुकुरी प्रहारबाट दाङमा एक महिलाको मृत्यु भएको छ । दुई जना गम्भीर घाइते भएका छन् ।

दाङ तुलसीपुर उपमहानगरपालिका– ११ मा शनिबार दिउँसो दुई बजे स्थानीय ४२ वर्षीय टेकबहादुर हमालले खुकुरी प्रहार गर्दा छिमेकी बेलटाकुराकी ४३ वर्षीया रीता लामिछानेको घटनास्थलमै मृत्यु भएको हो । हमालले प्रहार गरेको खुकुरीको चोटले स्थानीय अन्दाजी ६५ वर्षीया कमलाकुमारी हमाल र उनका छोरा ४५ वर्षीय वीरबहादुर हमाल गम्भीर घाइते भएका छन् ।

टाउकोमा गहिरो चोट लागेकी कमलाकुमारीलाई उपचारका लागि नेपालगञ्ज मेडिकल कलेज कोहलपुर लगिएको छ । हातमा चोट लागेका वीरबहादुरको भने राप्ती प्रादेशिक अस्पतालमा उपचार भइरहेको प्रहरीले जनाएको छ ।

खुकुरी प्रहार गर्ने टेकबहादुरलाई प्रहरीले पक्राउ गरेको छ । घरबाट खुकुरी लिएर निस्किएका उनले देउता चढेको भन्दै बाटोमा भेटिने सबैलाई अन्धाधुन्ध खुकुरी प्रहार गर्दै हिँडेका थिए ।

पक्राउ परेका टेकबहादुरको मानसिक स्वास्थ्य चेकजाँच भइरहेको र त्यसपछि मात्र केही कुरा बताउन सकिने जिल्ला प्रहरी कार्यालय दाङले जनाएको छ।

टेकबहादुर केही महिनाअघि मात्र भारतबाट फर्केका थिए । उनले घरमा कुखुरा पालन गरेका थिए ।