पोखरा । मौलिक तथा राष्ट्रिय संवत नेपाल संवत् ११४४ लाई पोखरामा भिन्तुना र्‍यालीसहित स्वागत गरिने भएको छ । नेवा खलः कास्कीले विविध कार्यक्रम गरी नेपाल संवतलाई स्वागत गरिने जानकारी दिएको हो ।

नेवाः खल कास्कीले सोमबार पत्रकार सम्मेलनको आयोजना गरी कार्यक्रमहरु सार्वजनिक गरेको छ । आगामी कार्तिक २८ गते म्हः पूजाका दिन पोखराका विभिन्न स्थलहरुमा पुगेर र्‍याली आयोजना गरिने नेवा खलः कास्कीका अध्यक्ष अशोक पालिखेले जानकारी दिए ।

उनका अनुसार उक्त दिन बिहान ७ः३० बजे पोखरास्थित नारायणस्थानमा रहेको राष्ट्रिय विभूति शंखधर शाख्वाको प्रतिमामा माल्यार्पण गरिनेछ । त्यसपछि ८ बजे कास्कीमा रहेका विभिन्न नेवा खलः, नेवा ल्याम्ह पुचः, नेवा कचाँ, नेवा मिसा पुचः लगायत विभिन्न जातीय समुदायहरुको सहभागितामा पृथ्वीचोकबाट भिन्तुना र्‍याली निकालिने छ ।

पृथ्वीचोकबाट सुरु हुने उक्त र्‍याली नयाँबजार महेन्द्रपुल, तेर्सापट्टि हुँदै नेवा छेँ कै भवनमा पुगेपछि समापन गरिनेछ । भिन्तुना र्‍यालीको अवसरमा आयोजना गरिने कार्यक्रमको प्रमुख अतिथि पोखरा महानगरपालिकाका मेयर धनराज आचार्य रहनेछन् ।

र्‍यालीमा सहभागी हुने समूहहरुलाई जातीय सांस्कृतिक पोशाक सहित उपस्थित हुन अध्यक्ष पालिखेले आग्रह गरेका छन् ।

पोखरा र आसपासमा रहेका नेवारी समुदायको झाँकी, बाजा तथा भेषभुषाहरुको प्रस्तुति र प्रचार प्रसार गर्ने उद्देश्यले र्‍याली आयोजना गर्न लागिएको नेवाः पत्रकार पुचः कास्कीकी अध्यक्ष अनिशा श्रेष्ठले जानकारी दिईन् ।

उक्त र्‍यालीमा उत्कृष्ट हुने समूहहरुमध्ये प्रथम हुनेलाई २५ हजार, द्वितीय हुनेलाई ७ हजार र तृतीय तथा सान्त्वना हुने समुहलाई नगद ५÷५ हजार पुरस्कारको समेत व्यवस्था गरेको आयोजकले जनाएको छ ।

नेपाल संवतलाई राष्ट्रिय संवतको रुपमा प्रचार गर्ने, स्थानीय कला संस्कृतिको प्रचार प्रसार गर्ने तथा आपसी भाइचाराको विकास गरी आत्मीयता कायम गर्ने उद्देश्यले ¥याली निकाल्न लागिएको आयोजकको भनाई छ ।

नेपाल सम्वत् नेपालमै प्रादूर्भाव भएको मौलिक संवत हो । राष्ट्रिय विभूति शंखधर साख्वाले विसं ९३७ इ सं ८८०० मा गरीब जनताको ऋण मोचन गरी नेपाल संवतको शुरुवात गराएका थिए । हाल नेवार समुदायले नेपाल सम्बत् नयाँ वर्षका रुपमा मनाउने गरेका छन् । साख्वाले तत्कालिन नेपाल भनेर चिनिने कान्तिपुर, पाटन र भादगाउँका जनताको ऋण तिरेर नेपाल सम्वत चलाएका हुन् ।

सरकारले नेपाल सम्वतका प्रवर्तक साख्वालाई विक्रम सम्बत २०५५ सालमा राष्ट्रिय विभूति घोषणा गरेको थियो ।