नेकपा एमालेको भातृ संगठन राष्ट्रिय युवा संघ नेपालले भुकम्प प्रभावित क्षेत्र जाजरकोट र रुकुम पश्चिमका विभिन्न स्थानमा खटेर अस्थाई टहरा बनाउने काममा तीव्रता दिएको छ ।

यसैक्रममा युवा संघ कास्कीका अध्यक्ष पानबहादुर जिसीको नेतृत्वमा रहेको गण्डकी प्रदेशबाट खटिएको ५० जनाको समूहले चौरजहारीमा अस्थायी टहरा बनाएर हस्तान्तरण समेत गरेको छ ।

चौरजहारी–१० र ११ का प्रभावित १४ घरपरिवारका लागि अस्थायी टहरा बनाएर हस्तान्तरण गरिएको अध्यक्ष जिसीले जानकारी दिएका छन् । स्थानिय साधन–स्रोतको प्रयोग गरेर काठपात राखेर माटोले लिपेको पर्खाल र त्रिपालको छानो भएको अस्थाई बास निर्माण गरेको अध्यक्ष जिसीले बताए ।

यसरी अस्थायी टहरा पाएपछि भुकम्पबाट घरबार विहिन भएका नागरिक पनि खुसी भएका छन् । चौरजहारी नगरपालिका–१० पोखरीका स्थानिय शशिराम राणाले भने– ‘सरकारको भर परेर त कहिले हो कहिले ? चिसोले सताएको बेला न्यानो अस्थायी घर पाएर खुसी लाग्यो ।’

सर्वसाधारणले युवा संघलाई धन्यवाद समेत दिएका छन् । यसपछि आफूहरु चौरजहारी नगरपालिकाको वडा नं. १० र ११ मा तीन वटा समूह बनाएर अरु अस्थायी टहरा बनाउने काममा खटिएको युवा संघ कास्कीका सचिव नवराज केसीले जानकारी दिए ।

‘पार्टी केन्द्रको निर्देशन अनुसार हामी खटिएका छौँ । यही मंसिर १४ गतेसम्म प्रभावित क्षेत्रमा खटेर काम गर्ने र यसपछी नेकपा एमालेको मध्यपहाडी जागरण अभियानमा जोडिने योजना छ’ उनले भने ।

माओवादी निष्क्रिय भएको आरोप लागिरहेको बेला एमालेले भने माओवादीको आधार इलाकामा पुर्न निर्माणलाई तीव्रता दिएको छ ।

विपत् व्यवस्थापन तथा स्वयंसेवक विभाग प्रमुख समेत रहेका एमाले केन्द्रीय सदस्य किरण पौडेल नेतृत्वको दस्ताले विगत पाँच दिन देखी जाजरकोट र रुकुममा पुनर्निर्माण तथा भग्नावशेष व्यवस्थापन गरिरहेको छ ।

माओवादीको आधार इलाका रुकुम पश्चिममा मात्रै एमालेका ४ सय स्वयंसेवक खटिएका छन् । उनीहरुले यहाँ अहिले सम्म सय भन्दा बढि घर पुनर्निर्माण गरिसकेका छन् ।

एमालेले खटाएका स्वयम सेवक दस्तामा रहेका युवाहरू अहिले आफ्नै खर्चमा ढलेका घरहरू उठाउन लागेका छन्। यहाँ २५ जनाको दरले ४० समूहमा विभिन्न स्थानमा भग्नावशेष व्यवस्थापन र पुनर्निर्माणको काम भइरहेको छ ।

यसैबीच, नेकपा एमाले मजदुर संगठन जिफण्ट, विद्यार्थी संगठन अखिल पनि खटिएको छ ।