राष्ट्रिय स्वतन्त्र पार्टी (रास्वपा) का सांसद स्वर्णिम वाग्लेलाई पार्टीको उपसभापति बनाइएको छ । यस्तै अनिलकेशरी शाहलाई पार्टीले केन्द्रीय सदस्य बनाएको छ ।

महोत्तरीको जलेश्वरमा आज (बुधबार) बसेको रास्वपाको संसदीय दल र केन्द्रीय समितिको संयुक्त बैठकले पार्टीका १४ सांसदलाई केन्द्रीय समितिमा मनोनयनसमेत गरेको छ । पार्टीका ६ सांसद यसअघि नै केन्द्रीय सदस्य थिए ।

पार्टीको विधानअनुसार सात जना प्रदेश सभापति पनि केन्द्रीय सदस्य रहनेछन् । पछिल्लो निर्णयअनुसार पार्टीको केन्द्रीय सदस्यको संख्या ६० पुगेको छ ।

पार्टी महामन्त्री मुकुल ढकालका अनुसार आज केन्द्रीय सचिवालयमा शाहसँगै राजन गौतम, नन्दन यादव, पुकार बम र कामिनी चौधरीलाई पनि समेटिएको छ ।

यस्तै, रास्वपाले तीनजना सह-प्रवक्ता पनि थपेको छ । जसमा मनीष झा, प्रतिभा रावल र रमेश प्रसाईं छन् ।

बैठकमा पार्टीको पदाधिकारी चयन र महाधिवेशनको प्रक्रियाबारे छलफल भएको छ । पार्टीको महाधिवेशन प्रक्रिया र नयाँ संगठनात्मक ढाँचाअनुसार पार्टी सञ्चालन गर्ने निर्णय गरिएको पनि ढकालले जनाए । उनले सोहीअनुसार पार्टी सचिवालय गठन गरिएको जानकारी दिए ।

यस्तो छ रास्वपाको सचिवालय :

१. सभापति – रवि लामिछाने

२. उपसभापति – डीपी अर्याल

३. उपसभापति – स्वर्णिम वाग्ले

४. महामन्त्री – मुकुल ढकाल

५. सह-महामन्त्री – कवीन्द्र बुर्लाकोटी

६. सह-महामन्त्री – सुमना श्रेष्ठ

७. सह-महामन्त्री – विपिन आचार्य

८. संसदीय दलको उपनेता – विराजभक्त श्रेष्ठ

९. प्रमुख सचेतक – सन्तोष परियार

१०. कोषाध्यक्ष – लिमा अधिकारी

११. सह-कोषाध्यक्ष – बसुमाया तामाङ

१२. सह-कोषाध्यक्ष – दीपक बोहोरा

केन्द्रीय सदस्य थप :

१. अनिलकेशरी शाह

२. राजन गौतम (चितवन)

३. नन्दन यादव (महोत्तरी)

४. पुकार बम

५. कामिनी चौधरी

अन्य पदाधिकारी :

१. सह-प्रवक्ता – मनीष झा

२. सह-प्रवक्ता – प्रतिभा रावल

३. सह-प्रवक्ता – रमेश प्रसाईं