पोखरा । बासकोटमा जारी दोस्रो सेभेन ए साइड वडा अध्यक्ष कप २०८० को उपाधि सिर्जनशील क्लब ग्रिनले हात पारेको छ ।

आइतबार भएको फाइनल खेलमा लामागाउँ एफसी ए लाई पेनाल्टी सुटआटमा हराउँदै नगद ५० हजार सिल्ड, ट्रफि, मेडल र प्रमाणप्रत्र प्राप्त गर्‍यो । दोस्रो भएको लामा गाउँले नगद ३० हजार, ट्रफि, मेडल र प्रमाणपत्र पायो ।

गत वर्षको विजेता रहेको लामागाउँलाई हराउँदै आयोजकको क्लबले कप जितेको हो ।

फाइलन खेलको समापन कार्यक्रमका प्रमुख अतिथि पोखरा महानगरपालिका २४ कास्कीकोटका वडा अध्यक्ष भरत बहादुर अधिकारीले कास्कीकोटले राम्रो खेलाडीहरु उत्पादन गरिरहेको बताए ।

उनले बासकोट खेलमैदानको भौतिक निमार्णमा अझै वडाले सहयोग गर्ने प्रतिवद्धता समेत जनाए । बासकोट खेलमैदानलाई वडाको मात्र खेल मैदान नभएर समग्र यस क्षेत्रको खेल मैदानको रुपमा विकास गर्न वडा लागि परेको बताए । विकास भनेको वाटो घाटो मात्र भन्ने सोच रहेको भन्दै अधिकारीले स्वास्थ्यको लागि खेलमा गरेको लगानी पनि विकास नै भएको बताए ।

चैत्र ९ गते देखि सञ्चालन भएको वडाध्यक्ष कपमा पोखरा महानगरपालिकाका वडा नं २३,२४ र १८ वडामा २० टिमको सहभागिता रहेको थियो ।

रङहरुको पर्व फागु पूर्णिमा (होली)को अवसर पारेर सिजनशील क्लब पोखरा २४ बासकोटले कपको आयोजना गरेको थियो । आगामी वर्ष पनि प्रतियोगिता गर्ने क्लबका अध्यक्ष शिव जिसिले बताए ।

प्रतियोगितामा सर्बोकृष्ट खेलाडी लामागाउँका सरोज तामाङ घोषित भए । उत्कृष्ट गोलकिपर सिर्जनशीलका आशिश दवाडी र सर्बाधिक गोलकर्ता भिम गौतम भए । उनीहरुले जनही २ हजार ५ सय, ट्रफि, मेडल र प्रमाणपत्र पाए । अनुशासित टिमको पुरस्कार फेवा क्लब पामेले प्राप्त गरेको छ ।

क्लब स्थापनाकाल देखि नै विभिन्न सामाजिक क्षेत्रमा सक्रिय रहँदै आएको छ । प्रतियोगिताबाट बचत भएको रकम बासकोट खेल मैदान निमार्णमा खर्च गरिने क्लबले जनाएको छ ।