ललितपुरको महानगरपालिका वडा नम्बर २५ सुगम बस्ती नख्खुडाेलबाट खाेलाले बगाएका चार जनामध्ये तीन जनाको जीवितै उद्धार भएको छ । उद्धारको याचनासहित टहरोको छानोमा उभिएका उनीहरूलाई नख्खु खोलाले बगाएको थियो ।

गुहार मागिरहेका बेला अचानक टहराे भत्केपछि उनीहरू खाेलासँगै बगेका थिए । यसरी बगेका चार जनामध्ये दुई जनालाई तेमाल गाउँपालिका ९ काभ्रेका ३३ वर्षीय चणिकलाल तामाङले उद्धार गरेका थिए भने एक जना आफैँ पाैडी खेलेर बाँच्न सफल भएका हुन् । एक जनाको अवस्था भने अहिलेसम्म अज्ञात छ ।

उद्धार गरिएका तीन जनाको अहिले पाटन अस्पतालमा उपचार भइरहेको छ । प्रहरीका अनुसार रौतहट घर भई सुगम बस्ती टोलमा बस्दै आएका ४३ वर्षीय राजु साह र उनकी छोरी ६ वर्षीया मेघना साहकाे चणिकलालले उद्धार गरेका हुन् । राजुका भाइ २२ वर्षीय राज साहले पाैडेर ज्यान जाेगाए । राजुकी छोरी करिब ४ वर्षीया शेर्तु साहकाे अवस्था अज्ञात छ । उनको खाेजी भइरहेको प्रहरीले जनाएको छ ।

मानिसहरू बगेको देखेपछि नख्खु खोलामा हाम फालेर चणिकलाल एक्लैले दुई जनालाई सकुशल उद्दार गर्न सफल भएका हुन् । राजु आफ्नी छोरी मेघनालाई च्यापेर पौडिँदै गरेका बेला चणिकलालले खाेलाबाट निकालेका थिए ।

ज्यानको याचनाबीच कतैबाट सहायता प्राप्त नहुँदा त्यही बेला फुत्त नख्खु खोलामा हाम फाले चणिकलाल । टहराको छानाबाट बगेका चार जना करिब ३ सय मिटर बगिसकेका थिए । चणिकलाल एक्लैले दुई जनालाई सकुशल उद्धार गर्न सफल भए ।

राजु आफ्नी छोरी मेघनालाई च्यापेर पौडिँदै गरेका बेला चणिकलालले निकालेका थिए ।

काभ्रेको तेमाल गाउँपालिका–९ घर भएका चणिकलाल पेन्टर हुन् । दशैंको मुखमा पेन्टिङ कामको चाप बढे पनि वर्षाका कारण शनिबारको काम रोकिएको थियो । उनी पनि आफ्नो वरपर बाढीको कहर हेर्न निक्लेका थिए ।