नेकपा एमालेले स्थानीय तहमा ४२ जना उम्मेदवार उठाएको छ। मंसिर १६ गते हुने स्थानीय तहको उपनिर्वाचनमा एमालेका तर्फबाट पालिका प्रमुख, उपप्रमुख र वडाअध्यक्ष गरी ४२ जनालाई स्थानीय तहमा उम्मेदवार बनाएको हो।

पार्टीले काठमाडौंको कीर्तिपुर नगरपालिकाको मेयरमा नेकपा एमालेका डा. सुरेन्द्र मानन्धरलाई उठाएको छ। आफ्नो विरासत जोगाउनुपर्ने भएकाले उपनिर्वाचनमा सबैभन्दा सकस कांग्रेस र माओवादी केन्द्रलाई देखिएको छ। एमालेले जितेको ९ वडामा मात्र उपचुनाव हुँदैछ।

निर्वाचन आयोगले आइतबार प्रकाशन गरेको विज्ञप्ति अनुसार साँझ ५ बजेसम्म ४ सय ७ जनाले सम्बन्धित निर्वाचन अधिकृतको कार्यालयमा मनोनयन पत्र दर्ता गरेका हुन्। कैलाली जिल्ला समन्वय समितिको प्रमुखमा २ जना महिला र ओखलढुंगा जिल्ला समन्वय समितिको प्रमुखमा १ जना पुरुष उम्मेदवारको मनोनयन पत्र दर्ता भएको छ।

यसैगरी, गाउँपालिका अध्यक्ष र उपाध्यक्ष तथा नगरपालिकाका प्रमुख र उपप्रमुखमा रिक्त ८ पदका लागि ३५ महिला, ४८ पुरुष र १ अन्य गरी जम्मा ८४ जना उम्मेदवारको मनोनयन पत्र दर्ता भएको छ।

साथै, गाउँपालिका र नगरपालिकाका वडा अध्यक्षको रिक्त ३४ पदका लागि २९ महिला, २९३ पुरुष र अन्य १ गरी जम्मा ३२३ जनाको मनोनयन पत्र दर्ता भएको छ।

उम्मेदवारको मनोनयन पत्र दर्ता भएका मध्ये सबैभन्दा धेरै धनुषाको धनुषाधाम नगरपालिका-१ को वडाध्यक्ष पदमा २१ जना र सबैभन्दा कम रुकुम (पूर्वी भाग)को पुथा उत्तरगंगा गाउँपालिका-२ को वडाध्यक्ष पद र बझाङको सुर्मा गाउँपालिका-४ को वडाध्यक्ष पदमा ३/३ जना उम्मेदवारको मनोनयनपत्र दर्ता भएको छ।

यी हुन् एमालेका उम्मेदवार