पोखरा । कास्कीको मादी गाउँपालिकामा माघे संक्रान्तीको अवसरमा लाग्ने मेलाको तयारी तीब्र पारिएको छ ।

बराल डाँडा भगबती बजार माघे संक्रान्ती मेलाका लागि आवस्यक तयारी तीब्र गतिमा गरिएको आयोजक बराल डाँडा तमु समाज सेवा समितीका अध्यक्ष चुम प्रसाद गुरुङ्गले जानकारी दिए । मादी नदीका किनारमा अवस्थित भगवती मन्दिर परिसरमा यो मेला पौराणिक कालदेखि लाग्दै आएको छ ।

विशेष गरी उक्त दिन मादी नदिमा स्नान गरि भगवती मन्दिरको अराधना गर्ने, उपवास बस्ने गरिन्छ । उक्त क्षेत्र र कास्की, लमजुङ्ग तथा तनहुँका मानिसहरुले भगवती देवीलाई विशेष महत्वका साथ लिने गर्दछन् ।

मेलाको अवसरमा माघ १ गते देखि वडास्तरीय भलिवल प्रतियोगिता, छेलो हान्ने प्रतियोगिता, भजन चुड्का प्रतियोगिता तथा विविध सांस्कृतिक कार्यक्रमहरुको आयोजना गरिएको छ । मेलामा राष्ट्रिय कलाकार लोक गायक चिज गुरुङ्ग, निर्जला गुरुङ्ग, जिवन दाहाल, मधु थापा मगर लागायतको उपस्थिति रहने आयोजक मध्ये बराल डाँडा युवा क्लवले जानकारी दिएको छ ।

प्रतियोगितामा भलिबल तर्फ प्रथम पुरस्कार रु एक लाख तथा द्वितीय पुरस्कार साठी हजार तथा छेला च्याम्पियन लाई रु २० हजार पुरस्कार राखिएको छ ।