जिल्ला अदालत काठमाडौं परिसरमा गत पुस २ गते वरिष्ठ अधिवक्ता दिनेश त्रिपाठीलाई कुटपिट आरोपमा पक्राउ परेकाहरू राष्ट्रिय स्वतन्त्र पार्टीका कार्यकर्ता रहेको खुलेको छ ।

त्रिपाठीमाथि जिल्ला अदालत काठमाडौं परिसरमा भएको हातपात प्रकरणमा पक्राउ परेका व्यक्ति रास्वपा कार्यकर्तासँगै सभापति रवि लामिछानेका खास कार्यकर्ता रहेको खुलेको हो ।

शनिबार पक्राउ परेका हुम्लाको अदानचुली गाउँपालिका-४ घर भई हाल काठमाडौंको सूर्यदर्शन हाइटमा बस्ने महानन्द जैसी (महेन्द्र पाण्डे) रास्वपाका खास कार्यकर्ता हुन् ।

त्रिपाठीलाई कुटिसकेपछि उनले सामाजिक सञ्जाल फेसबुकमा कुटपिटमा उत्रिनु गलत भएको भन्दै ब्याख्यासहित विचार हालेर जोगिन खोजेका थिए । ‘लोकतन्त्रमा विरोध गर्न मिल्छ । तर कसैको विरोध गर्दैमा, विपक्षमा उभिँदैमा भौतिक आक्रमण गर्नुलाई राम्रो मान्न सकिँदैन’ उनले लेखेका छन् ।

त्यसैगरी, प्रहरीले झापाको बुद्ध शान्ति गाउँपालिका- ४ घर भई हाल काठमाडौंको शान्तिनगर बस्ने ५५ वर्षीया शीतल राई भन्ने सीतादेवी राईलाई पनि आइतबार पक्राउ गरेको छ । राई रास्वपा काठमाडौं ३२ नम्बर वडाकी उपसभाति रहेको जानकारी आए पनि औपचारिक रुपमा पुष्टि हुन बाँकी रहेको एक प्रहरी अधिकारीले बताएका छन् ।

दोलखाको तामाकोशी गाँउपालिका वडा नं. १ स्थायी ठेगाना भइ ललितपुरको महालक्ष्मी नगरपलिका वडा नं. ५ टीकाथली बस्ने ४८ वर्षीय ललितकुमार केसी पनि पक्राउ परेका छन् ।