पोखरा । आहा! रारा पोखरा गोल्डकपको २४ औं संस्करणको उपाधिका लागि आज नेपाल पुलिस क्लब र पहिलो पटक नेपाल आएको उज्वेकिस्तानको ब्ल्याक बुल्स एफसी खेल्दैछन् ।

खेल पोखरा रङ्गशालामा आज दिउँसो दुई बजे सुरू हुनेछ ।

पुलिसले सेमिफाइनलमा ‘ए’ डिभिजन विजेता चर्च ब्वाइजलाई १–० ले हराएर फाइनलमा पुगेको हो । त्यस्तै सीधै क्वाटरफाइनल खेलेको बुल्सले सिक्किमको थन्डरबोल्ट नर्थ युनाइटेडलाई ३–० र सेमिफाइनलमा पाँच पटकको विजेता थ्री स्टारलाई ४–० ले हराएको थियो ।

पुलिसले ११औं पटक फाइनल खेल्न लागेको हो भने ब्ल्याक बुल्स पहिलो सहभागितामै फाइनल पुगेको हो ।

यसअघि ६ पटक उपाधि जितेको पुलिसले यसपाली पनि फाइनल जिते सर्वाधिक ७ पटक उपाधि जित्ने पहिलो टिम बन्नेछ ।

यो प्रतियोगितामा १२ टोली सहभागी थिए । प्रतियोगिताको उपाधि विजेताले १२ लाख एक हजार रुपैयाँ र उपविजेताले ६ लाख एक हजार रुपैयाँ पुरस्कार पाउनेछन् ।