पोखरा । पोखराको पृथ्वीनारायण क्याम्पस (पीएनसी) मा स्वतन्त्र विद्यार्थी युनियन (स्ववियु) निर्वाचनको मत गणना सुरु भएको छ ।

आज सोमबार बिहान ९ बजेबाट मत गणना सुरु गरिएको मुख्य निर्वाचन अधिकृत प्राडा रामचन्द्र पोखरेलले जानकारी दिए ।

आइतबार साँझ बसेको सर्वदलीय बैठकको निर्णय अनुसार आज बिहानबाट क्याम्पसभित्रै मत गणना सुरु गरेको उनले बताए । उनका अनुसार मंगलबार दिउँसो १२ बजेसम्म मत गणना कार्य सक्ने अनुमान छ ।

आइतबार बिहान ८ बजेदेखि ५ बजेसम्म भएको मतदानमा २ हजार ८९७ विद्यार्थी सहभागी भएका थिए । क्याम्पसमा ९२७० मतदाता रहेकोमा ३१.२५ प्रतिशत मात्र मत खसेको हो ।

स्ववीयु सभापति पदका लागि ८ जना चुनावी मैदानमा उत्रिएका छन् ।

सभापतिका लागि नेविसंघबाट सुशील न्यौपाने, अनेरास्ववियुबाट विष्णु पोखरेल, अखिल क्रान्तिकारीबाट नवीन अधिकारी, अनेरास्ववियु समाजवादी, अखिल समाजवादी, अखिल क्रान्तिकारी (वैद्य)को संयुक्त प्यानलबाट सन्तोष पौडेल सभापतिका उम्मेदवार हुन् ।

अखिल छैटौंबाट मिलन सुनार र प्राज्ञिक विद्यार्थी परिषदबाट दिप्सन गुरुङले स्ववीयु सभापतिमा उम्मेदवारी दिएका छन् । स्ववीयु सभापतिका लागि कमल सुवेदी र विप्लवी न्यौपानेले स्वतन्त्र उम्मेदवारी दिएका छन् ।

०६५ पछि यस क्याम्पसमा स्ववियु निर्वाचन हुन सकेको थिएन ।