पोखरा । गण्डकी विश्वविद्यालयको कुलपतिमा प्राडा इन्द्रप्रसाद तिवारी नियुक्त भएका छन् ।

मुख्यमन्त्री सुरेन्द्रराज पाण्डेले पोखरा महानगरपालिका–३१ का तिवारीलाई कुलपति नियुक्त गरेका हुन् । उनको ५ वर्ष कार्यकाल रहनेछ ।

प्राडा तिवारी पोखरा विश्वविद्यालयमा डिन हुँदै उपकुलपतिसमेत भइसकेका छन् । स्वतन्त्र अनुसन्धानकर्ता तथा विकास योजना र मानव बस्ती विकासका प्राध्यापक तिवारीले भूगोलमा स्नातकोत्तर (एमए) हासिल गरेका छन् ।

मानवबस्ती विकासमा एमएससी र ग्रामीण तथा क्षेत्रीय विकास योजनामा एशियन इन्स्टिच्युट अफ टेक्नोलोजी, थाइल्यान्डबाट पीएचडी उपाधि प्राप्त गरेका तिवारीलाई मुख्यमन्त्री पाण्डेले कुलपति रोजेका हुन् ।

विश्वविद्यालय न्याषिक परिषद्ले प्राडा तिवारीसहित प्राडा विश्वकल्याण पराजुली र प्राडा सरोज कोइरालाको नाम सिफारिस गरेको थियो । परिषद् अध्यक्ष तथा कुलपति छनोट समिति संयोजक प्राडा कैलाशनाथ प्याकुरेल, सदस्यद्वय प्रदेश लोक सेवा आयोग सदस्य कल्पना लम्साल र न्यायिक परिषद् सदस्य डा. यमुना घलेले चैत २१ गते मुख्यमन्त्री सुरेन्द्रराज पाण्डेलाई यी ३ जनाको नाम सिफारिस गरेका थिए ।

पहिलो कुलपति प्राडा गणेशमान गुरुङको गत फागुन ४ गते कार्यकाल सकिएसँगै विश्वविद्यालयले कुलपति नियुक्ति प्रक्रियाको थालनी गरेको थियो । २०७६ सालमा ऐन बनाएर मुख्यमन्त्री पृथ्वीसुब्बा गुरुङ नेतृत्वको सरकारले विश्वविद्यालय स्थापना गरेको थियो ।

कुलपतिका लागि ७ जनाले आवेदन दिएको भए पनि ५ जनाको मात्र स्वीकृत भएको थियो । आवेदन स्वीकृत हुनेमा यी ३ बाहेक प्राडा कुसुमाकर न्यौपाने र प्राडा नवराज देवकोटा समेत थिए ।