पोखरा । पोखरा महानगरपालिका अन्तर विद्यालय छात्रा टि–२० क्रिकेट प्रतियोगिताको उपाधि भद्रकाली माविले जितेको छ । पोखरा महानगरपालिका क्रिकेट संघको आयोजनामा पोखराको लेखनाथस्थित ईडेन हेभन क्रिकेट मैदानमा शुक्रबार भएको उपाधि भिडन्तमा वाराही माविलाई १४ रनले पराजित गर्दै भद्रकाली माविले उपाधि जितेको हो । उत्कृष्ट प्रदर्शनका बाबजुद वाराही मावि भने उपबिजेतामा सिमित भएको छ ।

बिजेता र उपबिजेता बनेका दुबै विद्यालयले ट्रफीसहित मेडल र प्रमाण पत्र प्राप्त गरेको छ ।

विहीबार भएको फाईनल खेलमा भद्रकाली माविले टस जितेर पहिलो व्याटिङ गर्दै निर्धारित २० ओभरमा ५ विकेट गुमाएर २२६ रन बनाएको थियो । भद्रकालीका लागि विष्फोटक व्याटिङ गरेकी रिया तामाङले ८० बलको सामना गर्दा १२४ रनको शतकीय पारी खेलेकी थिईन् । त्यस्तै, रिसा तामाङले २४ बलमा २४ रनको योगदान दिएकी थिईन् ।

२२७ रनको विशाल लक्ष्य पछ्याएको वाराही मावि ४ विकेटको नोक्सानीमा २१२ रनमा समेटिएपछि भद्रकाली १४ रनले बिजयी भएको हो । वाराही माविका लागि सुस्मिता श्रेष्ठले ७२ बलमा ६४ रन, सफलता भुजेलले ४७ बलमा २९ रन र मेघा खड्गीले १७ बलमा २६ रन हानेपनि जितका लागि पर्याप्त भएन । वाराहीलाई लक्ष्य भेट्टाउन नदिनका लागि भद्रकालीकी आसु गुरुङले ४ ओभरमा ४० रन खर्चेर २ विकेट हत्याईन् ।

फाइनल खेलको प्लेयर अफ दी म्याच बिजेता टिम भद्रकालीकी रिया तामाङ बनिन् । उनी प्लेयर अफ दी सिरिज र बेष्ट ब्याटरसमेत भईन् । त्यस्तै, वाराही माविकी सुस्मा पौडेल बेष्ट बलर घोषित भईन् । उनीहरुलाई ट्रफी र मेडल प्रदान गरिएको थियो ।

बिजेताहरुलाई पोखरा महानगरपालिका क्रिकेट संघका अध्यक्ष बिरेन्द्र पुन, पूर्व राष्ट्रिय खेलाडी राजकुमार छन्त्याल, म्याच अफिसियल प्रदीप तामाङलगायतले पुरस्कार वितरण गरेका थिए ।

यसैबीच, पोखरा महानगर क्रिकेट संघले अन्तर विद्यालय छात्रा टि–२० क्रिकेट प्रतियोगिताबाट उत्कृष्ट ३६ जना खेलाडी छनौट गरिने जनाएको छ । ती ३६ जनालाई ३ वटा टिम बनाएर केहि समयपछि सुपर लिग खेलाईने अध्यक्ष पुनले जानकारी दिए । उक्त सुपर लिगबाट उत्कृष्ट खेलाडी छनौट गरेर पोखरा महानगरपालिकाको टिम बनाईने उनको भनाई छ । ‘त्यसपछि देशभरका महानगरपालिका स्तरीय क्रिकेट प्रतियोगिता आयोजना गरेर खेलाडीलाई एक्सपोजर दिईन्छ’– उनले भने ।