लमजुङ । लमजुङको मर्स्याङ्दी गाउँपालिका ४, कालाघिरिङका ५७ वर्षिय नरबहादुर गुरुङ गाउँमाथिको ठूलोढुंगा नजिकै रहेको गाई गोठमा मंगलबार बिहान मृत भेटिए ।

बिहान ६ बजेतिर उनी मृत अवस्थामा भेटिएपछि गाउँमा हल्लाखल्ला भयो । प्रहरीमा सूचना पुग्ने वित्तिकै प्रहरी टोली गोठमा पुग्यो । गोठमा गुरुङको शरीरका विभिन्न भागहरु, टाउको तथा अनुहार समेतको भागमा चोट देखियो । आँखा नजिक काटिएको, घाउहरु लागेर रगताम्य भएको, पेटमा निलडामहरु रहेको र घटनास्थलमा रगत जस्तो देखिने रातो पदार्थ लागेको चिरपट दाउरा, काठको लौरो र बन्चरो समेत फेला फेला पर्‍यो ।

कसैले कर्तव्य (हत्या) गरेको हुन सक्ने प्रारम्भिक निष्कर्षमा पुगेको प्रहरी अनुसन्धान टोलीले गोप्य रुप्मा बुझ्न थाल्यो । त्यसपछि गाउँलेको शंका र प्रहरीको शंका मिलेपछि प्रहरीले उनै नरबहादुरका जेठो छोरा २३ वर्षिय लुबहादुर गुरुङलाई नियन्त्रणमा लियो ।

सोधपुछका क्रममा अघिल्लो दिन राती मादक पदार्थ सेवन गरेर बुवासंग विवाद भएको र सोही झोकमा चिर्पट दाउरा तथा बन्चरोले प्रहार गर्दा बुवाको मृत्यु भएको उनले स्वीकारे । लुबहादुरले बुवाको शवलाई विस्तारामा सुताई छाडेको समेत स्वीकारेपछि उनलाई जिल्ला प्रहरी कार्यालय ल्याइएको थियो ।

आफ्नै बुवाको हत्यामा संलग्न लुबहादुरविरुद्ध जिल्ला अदालतबाट ज्यान सम्बन्धी कसूर (कर्तब्य ज्यान) मुद्दामा बुधबार दिन ७ को म्याद थप अनुमति लिइ अनुसन्धान कार्य भइरहेको जिल्ला प्रहरी कार्यालय लमजुङका सूचना अधिकारी प्रहरी निरीक्षक राज किशोर साह तेलीद्धारा जारी प्रेस रिलिजमा उल्लेख छ ।