पोखरा महानगरपालिका वडा नं. १५ स्थित वन विज्ञान अध्ययन संस्थान नजिकै सडकमा हत्या गरिएका युवकको सनाखत भएको छ ।

यस्तै, घटनामा संलग्नलाई पनि कास्की प्रहरीले केही घण्टामै पक्राउ गर्न सफल भएको जनाएको छ ।

मृत्यु हुनेमा तनहुँका २० वर्षीय मनोज भुजेल रहेको वडा प्रहरी कार्यालय, रामबजारका प्रमुख प्रहरी निरीक्षक तेज प्रसाद कँडेलले जानकारी दिए । इन्स्पेक्टर कँडेलले सोमबार ठेगाना भीमाद बताएकोमा भुजेल शुक्लागण्डकी नगरपालिका–१२, लिलाचोकका रहेको खुलेको छ ।

मृतक भुजेल पोखरा १४ मा बस्दै आएको र त्यहाँ नजिकै खहरेमा प्लटिङमा काम गर्दै आएका मजदुर रहेको उनले बताए ।

सडकमा रक्ताम्मे अवस्थामा मृत भेटिएका भुजेलको शव नजिकै ह्यामर थियो । बिहान ५ बजे बीच सडकमा शव देखिएपछि स्थानीयले प्रहरीलाई खबर गरेको पोखरा १५ का वडा सदस्य आशिष भण्डारीले जानकारी दिए ।

ट्याक्टर चालक र १४ वर्षीय सहचालक पक्राउ

घटनामा संदीग्ध नाबालकसहित दुई जना प्रकाउ गरेको प्रहरीले पुष्टि गरेको छ ।

यद्यपि, कास्की प्रहरीले घटनामा संलग्न २ जना पक्राउ परेको पुष्टि गरेपनि थप विवरण भने दिएको छैन । ‘दुई जना पक्राउ परेका छन् । हत्या किन गरे भन्ने कारणबारे सोधपुछ जारी छ । अहिले यति मात्रै दिन मिल्ने कुरा भयो । केही समयपछि पत्रकारलाई जानकारी दिनेछौँ ।’ – कास्कीका प्रहरी प्रवक्ता डीएसपी हरिबहादुर बस्नेतले गण्डकन्यूजसँग भने ।

प्रहरी श्रोतका अनुसार पक्राउ पर्नेमा स्याङ्जा जिल्ला पकवादी गाउँपालिका–९ स्थायी घर भई हाल पोखरा–१४, छिनेडाँडामा बसोबास गर्दै आएका २० वर्षीय पवन राना सहित दुई जना छन् । १४ वर्षीय बालक (नाम गोप्य) सहचालक हुन् । प्रहरीले सुरूमा वालिङ १० घर भएको बताएको थियो ।

उनीहरूसहित ग १ त ३३२० नम्बरको ट्याक्टर पनि प्रहरी नियन्त्रणमा रहेको बुझिन्छ ।

बिहान ११ बजेतिर छिनेडाँडाबाट उनीहरू पक्राउ परेका हुन् । मृतक र अभियुक्त सबै मजदुर हुन् । उनीहरू राति सँगै फर्कदैँ थिए ।

यद्यपी, अभियुक्तद्वयले प्रारम्भिक अनुसन्धानका क्रममा हत्या नगरेको जिकिर गरेका छन् । भुजेल र सँगै रहेको घन ट्याक्टरबाट सडकमा खसेको उनीहरूको भनाई रहेको छ । तत्काल ट्याक्टरको टायरले किचेको उनीहरूले बताएका छन् । सडकमा भुजेलको शवसँगै घन भेटिएको थियो । पोष्टमार्टमको रिपोर्ट सार्वजनिक भइसकेको छैन ।

• अद्यावधिक गरिएको

सम्बन्धित समाचारः

वन विज्ञान क्याम्पस क्षेत्रका स्थानीय भन्छन्ः घटना राति नै भएको हुनसक्छ

पोखराको वन क्याम्पस नजिकै सडकमा युवकको हत्या