पोखरा । नेपाल ओलम्पिक संग्रहालयका संस्थापक क्षितिज अरुण श्रेष्ठको निधन भएको छ ।

लामो समयदेखि उपचार गराइरहेका काठमाण्डौ ढल्कोका ५५ वर्षीय श्रेष्ठको पाटन अस्पतालमा उपचारको क्रममा अस्ति आइतबार राति निधन भएको हो । उनको हिजो पशुपति आर्यघाटमा अन्त्येष्टि गरिएको छ । उनका श्रीमती र एक छोरी छन् ।

लामो समय खेलकुद पत्रकारिता र फोटो पत्रकारिता गरेका श्रेष्ठले विभिन्न सञ्चार माध्यममा काम गरेको अनुभव छ । उनले नेपाल डाटा एन्ड रिसर्च सेन्टरको स्थापना गर्दै खेलकुदसम्बन्धी पुस्तकहरु प्रकाशन गरेका थिए ।

नेपाल स्टिक स्पोट्र्स संघका सचिव समेत रहेका श्रेष्ठ विजनेश डाटा नेपाल प्रालिका प्रबन्ध निर्देशक थिए । उनले नेपालका विशिष्ट महिलाहरुको फोटो प्रदर्शनी गरेका थिए ।

खेलकुद पत्रकार मञ्चले आफ्नो संस्थापकको निधन प्रति शोक व्यक्त गरेको छ। २०५२ सालमा स्थापना भएको मञ्चका ११ संस्थापक मध्ये श्रेष्ठ एक हुन् ।