काठमाडौँ — राष्ट्रिय स्वतन्त्र पार्टी (रास्वपा)का नेता मोहनबहादुर थापालाई अमेरिकी सरकारले निष्कासन गरेको छ । अमेरिकामा बसेर विभिन्न कसुर गरेको आरोपमा नेता थापालाई निष्कासन गरिएको हो ।

स्रोतका अनुसार थापाको ग्रीनकार्डसमेत रद्द गरेर अमेरिकाले फर्काएको हो ।

त्रिभुवन अन्तर्राष्ट्रिय विमानस्थल अध्यागमन स्रोतका अनुसार अमेरिकाबाट निष्कासनमा परेका थापा गत साउन २२ गते नेपाल आइपुगेका हुन् । अमेरिकाबाट भारत हुँदै एयर इन्डियाको उडान नम्बर एआई २११ बाट उनी २२ साउनमा काठमाडौं विमानस्थल ओर्लिएका थिए । लगत्तै विमानस्थल अध्यागमनले कागज गराएर थापालाई मानव बेचविखन अनुसन्धान ब्युरोको जिम्मा लगाएको थियो । ब्युरोले पनि उनलाई कागज गराएर छाडेको छ ।

१ मार्च १९६९ मा जन्मिएका ५६ वर्षीय थापालाई गैरकानुनी रुपमा गतिविधि गरेको आरोपमा अमेरिकाको इमिग्रेसन एन्ड कस्टम इन्फोर्समेन्ट (आइस) ले केही समय अगाडि नै नियन्त्रणमा लिएर अनुसन्धान गरेको थियो । अनुसन्धानको क्रममा उनी अध्यागमन तथा अमेरिकी अरु कानुन उल्ल‌ंघन कसुरमा अनुसन्धानमा तानिएका थिए ।