स्याङ्जाको वालिङ नगरपालिका–१ बौवास्थित अर्मादीखोलामा पक्की पुल निर्माणको काम अघि बढाइएको छ । नगरपालिकाले निर्माण गरिरहेको आँधीखोला कोरिडोरअन्तर्गत पर्ने यो पुल बनेपछि सिद्धार्थ राजमार्गको वैकल्पिक मार्गका रूपमा प्रयोग गर्न सकिने अपेक्षा गरिएको छ ।

आँधीखोला र अर्मादीखोलाको दोभान क्षेत्रमा पुल बन्ने भएपछि वालिङ बजारबाट सरसफाइ केन्द्रसम्मको आवतजावत सहज हुने नगरपालिकाले जनाएको छ । पुल सञ्चालनमा आएपछि दैनिक सङ्कलन हुने कुहिने, नकुहिने तथा अन्य फोहोर सरसफाइ केन्द्रसम्म पुर्‍याउन सहज हुने नगरपालिकाका इन्जिनियर ध्रुव रेग्मीले बताए । वैकल्पिक सडकका रूपमा प्रयोग हुँदा सर्वसाधारणलाई समय र खर्च दुवै बचत हुने उनको भनाइ छ ।

पुल निर्माणका लागि डिएसएमवाइ जेभीसँग तीन करोड ३७ लाख रुपैयाँ लागतमा ठेक्का सम्झौता भएको छ । विसं २०८३ जेठ मसान्तभित्र निर्माण सम्पन्न गर्ने लक्ष्य राखिएको छ । एक स्पानमा बन्ने पुलको लम्बाइ २५ मिटर र फुटपाथसहित चौडाइ ८ दशमलव ४० मिटर रहनेछ । हाल पुलको फाउन्डेसन निर्माणको काम सुरु भइसकेको इन्जिनियर रेग्मीले जानकारी दिए ।

यसअघि हिउँदमा खोलाबाटै सवारीसाधन वारपार गरिए पनि वर्षायाममा ठूलो समस्या हुने गरेको थियो । सरसफाइका गाडी तथा दैनिक ढुवानी अन्य बाटो घुमाएर लैजानुपर्दा समय र खर्च बढ्ने गरेको स्थानीयको गुनासो थियो । खेतीपाती गर्ने किसानलाई पनि वर्षामा ट्याक्टर तथा अन्य साधन आवतजावत गर्न कठिन हुँदै आएको थियो ।

वालिङ बजारबाट सरसफाइ केन्द्र पुग्न अर्मादी र मिर्दी खोलाको बाटो प्रयोग गर्नुपर्ने अवस्था छ । यस वर्ष अर्मादीखोलामा पुल बन्न थाले पनि मिर्दी खोलामा भने अझै खोलामै सवारीसाधन चलाउनुपर्ने बाध्यता रहेको स्थानीय बताउँछन् ।

वर्षायाममा पनि आँधीखोला कोरिडोरमा निर्वाध सवारी सञ्चालन गर्ने लक्ष्यसहित पुल निर्माण अघि बढाइएको नगरपालिकाले जनाएको छ । इन्जिनियर रेग्मीका अनुसार आगामी आर्थिक वर्षमा मिर्दी खोलामा पनि पक्की पुल निर्माणका लागि ठेक्का प्रक्रिया अघि बढाउने तयारी भइरहेको छ ।

आँधीखोला किनारैकिनार बनेको कोरिडोरमा पुलहरू निर्माण भएसँगै आसपासका खेतीयोग्य जमिनमा उत्पादित कृषि उपज तथा नदीजन्य सामग्री ढुवानी सहज हुने अपेक्षा गरिएको छ । कोरिडोर पूर्ण रूपमा सञ्चालनमा आएपछि सिद्धार्थ राजमार्ग र वालिङ बजारभित्रका सडकमा सवारी चाप घट्ने विश्वास लिइएको छ ।