पोखरा । गत निर्वाचनमा कास्की जिल्लाका तीन निर्वाचन क्षेत्र नै नेकपा एमालेले जितेको थियो । तर, यसपटक तीनै क्षेत्रमा घण्टी उम्मेदवार अगाडि देखिएका छन् ।

कास्की क्षेत्र नम्बर १ मा ५ हजार १५० मत गणना हुँदा राष्ट्रिय स्वतन्त्र पार्टी (रास्वपा) का उम्मेदवार खड्गराज पौडेल‘गनेस’ले २ हजार ३०६ मत ल्याएका छन्।

१८८ मत बदर हुँदाको अवस्थामा एमालेका उम्मेदवार बैनबहादुर अधिकारी क्षेत्री १ हजार ४५५ मतसहित दोस्रो र नेपाली कांग्रेसका उम्मेदवार तिलक रानाभाट ९६७ सहित तेस्रो स्थानमा छन्।

नेपाली कम्युनिस्ट पार्टीका राजकाजी गुरुङ ‘करन’ले १०८ मत प्राप्त गरेका छन्। सो क्षेत्रमा कुल १ लाख १६ हजार ८ सय ७८ मतदाता रहेकोमा ३८ हजार १६६ महिलासहित ७० हजार २३६ जनाले मतदानमा भाग लिएका थिए।

कास्की क्षेत्र नम्बर १ को गणना रुपा गाउँपालिकाबाट सुरु गरिएको हो। रुपा एमालेको आधार क्षेत्रको रुपमा चिनिन्थ्यो।

सो पालिकामा हाल अध्यक्ष र उपाध्यक्ष दुबै एमालेकै छन्। कास्की क्षेत्र नम्बर २ मा पनि रास्वपाकै उम्मेदवार उत्तम पौडेल अगाडि छन्।

हालसम्म गणना भएको ६ हजार १३८ मध्ये उत्तमले ३ हजार ७०,एमालेका रश्मि आचार्यले १ हजार ४१४ र कांग्रेसका माधव बास्तोला‘मधु’ले ९३२ मत प्राप्त गरेका छन्। २५१ मत बदर हुँदा नेपाली कम्युनिष्ट पार्टीका हेमबहादुर थापा‘किरण’ले २७६ अनि राष्ट्रिय प्रजातन्त्र पार्टीका हेमजंग गुरुङले ११७ मत ल्याएका छन्।

कास्की २ मा २८ हजार ७५५ महिलासहित ५२ हजार ९१९ मत खसेको छ। यहाँ ८४ हजार १३४ जना मतदाता थिए।

कास्की २ को मतगणनाको सुरुवात पनि वडा नम्बर ३३ बाट भएको हो। यसअघि पोखराको दक्षिणी भागमा पर्ने सो क्षेत्रलाई ‘कोर कोरिया’कै नामबाट चिनिन्थ्यो।

कास्की क्षेत्र नम्बर ३ मा पनि रास्वपा उम्मेदवार विना गुरुङले मतान्तर बढाउँदै लगेकी छन्।

निर्वाचन अधिकृतको कार्यालयका अनुसार ३ हजार ७३६ मत सदर हुँदा एक्लो विनाको पोल्टामा २ हजार ७४ मत परेको छ।

नेपाली कांग्रेसका मनोज गुरुङले ८९३ र एमालेका दामोदर वैरागीले ५०६ मत मात्र पाएका छन्।

नेपाली कम्युनिस्ट पार्टीका गोपाल गिरीले ११८ मत ल्याउँदा राष्ट्रिय प्रजातन्त्र पार्टीका अर्जुन खनालले ८६ मत प्राप्त गरेका छन्।

कास्की क्षेत्र नम्बर ३ मा हालसम्म गणना भएको ३ हजार ८८६ मध्ये १५० मत बदर भएका छन्।

कास्की क्षेत्र नम्बर ३ मा १ लाख ७ हजार ५६० मतदाता रहेकोमा ६५ हजार ४०७ मत खसेको थियो।