भोटेकोशी बाढीको ११औं दिनमा चारतले घरको माथिल्लो तलाबाट एक महिलाको जीवितै उद्धार गरिएको छ ।

नुवाकोटको विदुर नगरपालिका वेत्रावतीबाट ६० वर्षीया चण्डिका श्रेष्ठको आज जीवितै उद्धार गरिएको हो । उक्त घर आनन्द श्रेष्ठको हो ।

१९ नं गुल्मबाट सप्रनि सुमनकुमार बिकको कमाण्डमा खटिएको ९ जनाको टोलीले ४ तले घरको माथिल्लो तलाबाट उनलाई उद्धार गरेको थियो ।

आजै माथिल्लो त्रिशूली–१ को अडिट- ४ सुरुङबाट एक चिनियाँ नागरिको पनि उद्धार गरिएको सैनिक प्रवक्ता राजाराम बस्नेतले जानकारी दिए । उनको उद्धारमा नेपाली सेना र दक्षिण कोरियाको डिजास्टर विज्ञ टोली खटिएका थिए ।

प्रहरीले आधा पुरिएको घरभित्रबाट मानिसको आवाज आएपछि उत्खनन गर्दा श्रेष्ठलाई जीवितै फेला पारेको हो।

११ दिनसम्म पहिरोमा पुरिएर पनि जीवितै रहन सफल श्रेष्ठलाई उपचारका लागि स्वास्थ्य संस्था लगिएको छ।

यो चमत्कारिक घटनाले स्थानीय बासिन्दा र उद्धारमा खटिएका सुरक्षाकर्मीहरूलाई अचम्मित र खुसी तुल्याएको छ। भदौ १० को भीषण बाढीका कारण सो क्षेत्रमा ठुलो क्षति पुगेको थियो।