पोखराको फेवातालमा कायकिङ गर्ने क्रममा उदयपुरका २१ वर्षीय आयुष तामाङको डुबेर मृत्यु भएको छ।

तालबाराही मन्दिर पछाडिको क्षेत्रमा कायकिङ गर्ने क्रममा तामाङ डुबेको कास्की प्रहरी प्रवक्ता डीएसपी वीरेन्द्रकुमार पासवानले गण्डकन्यूजलाई जानकारी दिए।

मानिस डुबेको सूचना प्राप्त भएपछि सशस्त्र प्रहरी बल, नेपाल नं. २४ गण हे.क्वा. कालिका फेवा रेस्क्यु टावरबाट उद्धार टोली परिचालन गरिएको थियो। सशस्त्र प्रहरी सहायक निरीक्षक रामप्रसाद शर्माको कमाण्डमा गोताखोरसहितको विपद् उद्धार टोली आवश्यक उद्धार सामग्री लिएर खोज तथा उद्धारमा खटिएको थियो।

खोजीका क्रममा दिउँसो २ः५० बजे गोताखोर टोलीले फेवातालको करिब ३० फिट गहिराइबाट तामाङलाई अचेत अवस्थामा फेला पारी बाहिर निकालेको थियो।

उद्धारलगत्तै उनलाई थप उपचारका लागि दिउँसो २ः५५ बजे पोखरा स्वास्थ्य विज्ञान प्रतिष्ठान, पश्चिम क्षेत्रीय अस्पताल पठाइएको थियो। उपचारका क्रममा अस्पतालले साँझ ५ः३५ बजे उनलाई मृत घोषणा गरेको प्रवक्ता पासवानले जानकारी दिए।

पछिल्लो समय फेवातालमा कायकिङ गर्ने पर्यटक तथा सर्वसाधारणको भीड बढ्दै गएको छ। कायकिङका क्रममा हुन सक्ने जोखिमलाई मध्यनजर गर्दै सुरक्षा सावधानी अपनाउन तथा आवश्यक सुरक्षा सामग्रीको प्रयोग गर्न सम्बन्धित निकायले आग्रह गर्नुपर्ने देखिएको छ। फेवातालमा कायकिङ गर्नेहरूले पनि आफ्नो सुरक्षालाई प्राथमिकतामा राख्न आवश्यक छ।

घटनाबारे प्रहरीले थप अनुसन्धान गरिरहेको जनाएको छ।