स्याङ्जाको भीरकोट नगरपालिका–१ बयरघारी बजारमा जडान गरिएका सिसिटिभी क्यामराको नियन्त्रण प्रहरीको हातमा पुगेपछि बजार क्षेत्रको निगरानी थप कडा हुने भएको छ । यसअघि वडा कार्यालयमा रहेको कन्ट्रोल रुम दहथुम प्रहरी चौकीमा सारिएपछि बजार र सिद्धार्थ राजमार्गको गतिविधि अब प्रहरीले प्रत्यक्ष निगरानी गर्न सक्ने भएको हो ।

बयरघारीका मुख्य बजार, व्यस्त चोक, सार्वजनिक स्थल र सिद्धार्थ राजमार्गलाई लक्षित गरी हाल नौवटा सिसिटिभी क्यामरा जडान गरिएको छ । प्रहरी चौकीमा राखिएको कन्ट्रोल रुमबाट क्यामराको दृश्य हेर्न सकिने र फुटेज सुरक्षित राख्न पासवर्डको समेत व्यवस्था गरिएको छ ।

प्रहरीका अनुसार सिसिटिभीले चोरी, झैझगडा, तोडफोडलगायतका घटना नियन्त्रण र अनुसन्धानमा सहयोग पुग्नेछ । राजनीतिक दल तथा विभिन्न समूहका सभा, जुलुस र सम्मेलनका क्रममा हुन सक्ने अवाञ्छित गतिविधिको निगरानीमा समेत यसको उपयोग गर्न सकिने अपेक्षा गरिएको छ ।

दहथुम प्रहरी चौकीका प्रमुख प्रहरी सहायक निरीक्षक पुष्कर पोखरेलले सीमित जनशक्तिबाट बजारका सबै क्षेत्रमा प्रत्यक्ष निगरानी गर्न कठिन हुने अवस्थामा सिसिटिभी प्रभावकारी माध्यम बनेको बताए । प्रहरी चौकीमै कन्ट्रोल रुम आएपछि विभिन्न स्थानको गतिविधि एउटै ठाउँबाट हेर्न सहज भएको उनको भनाइ छ ।

दुर्घटना र ट्राफिक नियम उल्लङ्घनमा पनि निगरानी
सिसिटिभीले अपराध नियन्त्रणसँगै ट्राफिक व्यवस्थापनमा समेत सहयोग गर्ने भएको छ । मुख्य चोक र राजमार्ग क्षेत्रमा हुने दुर्घटना, ट्राफिक नियम उल्लङ्घन तथा दुर्घटनापछि फरार हुने सवारीसाधन र चालक पहिचानमा क्यामराको फुटेज उपयोगी हुने अस्थायी ट्राफिक प्रहरी पोस्ट दहथुममा कार्यरत ट्राफिक प्रहरी सहायक हवल्दार ज्ञानबहादुर थापाले बताए ।

तर अहिलेको प्रणालीमा एउटा कमजोरी पनि छ । कन्ट्रोल रुममा विद्युत् आपूर्ति बन्द हुँदा तत्काल चलाउन सकिने वैकल्पिक विद्युत् व्यवस्था छैन । विद्युत् अवरुद्ध हुँदा २४ घण्टे निगरानी प्रभावित हुन सक्ने भएकाले यसको विकल्प आवश्यक देखिएको छ ।

जडानभन्दा ठूलो चुनौती नियमित सञ्चालन
सिसिटिभी जडान भएपछि अब यसको दीर्घकालीन व्यवस्थापन चुनौती बनेको छ । घाम, पानी, हावाहुरी र अन्य प्राविधिक कारणले सडकमा राखिएका क्यामरा बिग्रन सक्ने भएकाले नियमित मर्मतसम्भार र समयमै उपकरण स्तरोन्नति गर्नुपर्ने देखिन्छ ।

भीरकोट उद्योग वाणिज्य संघका अध्यक्ष नुवादत्त अर्यालले नियमित मर्मतका लागि नगरपालिकाले बजेट सुनिश्चित गर्नुपर्ने बताए । उनका अनुसार प्रहरीको प्रत्यक्ष निगरानीमा सिसिटिभी पुगेपछि बजारवासी भने उत्साहित भएका छन् ।

नगरप्रमुख गोविन्दकुमार कर्माचार्यले दशैँ–तिहारअघि बयरघारीका थप क्षेत्रमा सिसिटिभी विस्तार गर्ने तयारी भइरहेको बताए । नगर प्रवक्ता दिपेन्द्र केसीका अनुसार कोरोनाकालअघि नै सार्वजनिक शौचालयको माथिल्लो तलामा कन्ट्रोल रुम राख्ने योजना भए पनि भवन पहिरोले भत्किएपछि प्रणाली वडा कार्यालयमा सारिएको थियो । अहिले प्रहरी प्रशासनमा जनशक्ति थपिएपछि नगरपालिकाकै पहलमा कन्ट्रोल रुम प्रहरीलाई हस्तान्तरण गरिएको हो ।

निवर्तमान नगरप्रमुख छायाराम खनालले आफ्नो कार्यकालमा बजार सुरक्षाका लागि सिसिटिभी जडानको सुरुआत गरिएको बताउँदै अब यसलाई प्रत्येक टोलसम्म विस्तार गर्नुपर्ने बताए ।

राष्ट्रिय स्वतन्त्र पार्टी भीरकोटका सभापति मिनबहादुर केसीले बयरघारीमा मात्रै सीमित नराखी हेलुदेखि छाङछाङदीसम्मका महत्वपूर्ण स्थानमा यसको पहुँच विस्तार गर्नुपर्ने बताए । नेपाली कांग्रेस भीरकोटका सभापति लक्ष्मण अधिकारीले पनि बजार सुरक्षाका लागि सिसिटिभी आवश्यक रहेको भन्दै प्रत्यक्ष निगरानीबाट यसको अधिकतम उपयोग गर्नुपर्ने बताए ।

बयरघारीमा प्रहरीको प्रत्यक्ष निगरानी सुरु भएपछि अपराध नियन्त्रण, अनुसन्धान र ट्राफिक व्यवस्थापनमा सहजता हुने अपेक्षा गरिएको छ । तर क्यामरा जडान गरेर मात्रै सुरक्षा बलियो हुँदैन । त्यसलाई २४ घण्टा चलाइराख्ने विद्युत्, नियमित मर्मत, प्राविधिक जनशक्ति र पर्याप्त बजेटको दीर्घकालीन व्यवस्था गर्न सके मात्रै सिसिटिभीको वास्तविक प्रभाव देखिनेछ ।