नेपाली कांग्रेसको १५औँ महाधिवेशनअन्तर्गत स्याङ्जा क्षेत्र नम्बर २ मा प्रतिनिधि छनोटको मतदान विवादित बनेपछि क्षेत्रीय सभापति दिलीपप्रताप खाँणले महाधिवेशन प्रक्रियाबाट अलग रहने घोषणा गरेका छन् ।

असोज १३ गते भएको मतदान व्यवस्थापनमा समस्या देखिएपछि स्थगित भएको थियो । त्यसपछि पुनः मतदान गर्ने तयारी भए पनि समय भने निश्चित भइसकेको थिएन ।

प्रतिनिधि छनोट प्रक्रिया व्यवस्थापकीय कमजोरीका कारण विवादमा परेको स्थानीय नेता–कार्यकर्ताको भनाइ छ । क्षेत्रीय सभापति खाँणले भने केन्द्रदेखि पालिकासम्मका निर्वाचन समितिले निर्वाह गर्नुपर्ने जिम्मेवारी प्रभावकारी रूपमा पूरा नगरेको बताएका छन् ।

बिहीबार जारी गरेको वक्तव्यमा खाँणले गुटबन्दी, होहल्ला, अफवाह फैलाउने, भइसकेको सहमति नमान्ने, चरित्र हत्या र झुटा प्रचार गर्ने तथा एकपछि अर्को उजुरी दिने गतिविधि भएको उल्लेख गरेका छन् । यस्ता गतिविधिप्रति असहमति जनाउँदै नैतिकताको आधारमा महाधिवेशन प्रक्रियाबाट अलग रहने उनले बताएका हुन् ।

खाँणले अब हुने निर्वाचन तथा महाधिवेशन प्रक्रियामा सहयोग गरिदिन स्याङ्जा–२ अन्तर्गतका निर्वाचित पालिका सभापतिहरूलाई आग्रह गरेका छन् ।

यसैबीच केन्द्रीय निर्वाचन समितिको निर्देशनअनुसार स्याङ्जा–२ मा पुनः मतदान हुने भएको छ । जिल्ला निर्वाचन अधिकृत फणिन्द्रराज कोइरालाले असोज १३ गते स्थगित भएको मतदान असोज १६ गते बिहान ८ बजेदेखि वालिङ खेलमैदानमा हुने जानकारी दिएका छन् ।