चितवन । सत्तारुढ दल रास्वपाका सभापति रवि लामिछानेले आज चितवनमा गरेको सम्बोधनले पार्टीपंक्तिलाई तरंगित बनाएको छ ।

रास्वपाकै संगठन विभाग प्रमुख प्रमोद न्यौपानेले सभापतिले ‘सिधाकुरा’ शैलीमा बोलेको भनेर फेसबुकमा लेखेका छन् ।

लामिछाने पार्टीभित्र झांगिएको विकृति र पदलोलुपताप्रति निर्मम सुनिए । पार्टी नेतृत्वको सरकारप्रति सिधा टिप्पणी नगरे पनि घुमाउरोरुपमा सचेत गराए । लोकतन्त्र र स्वतन्त्र प्रेसको पक्षमा दृढता व्यक्त गरे ।

प्रतिनिधिसभा निर्वाचनपछि कार्यकर्ता भेटघाट, बाढी प्रभावित क्षेत्रको अनुगमन र स्थानीय व्यवसायीहरूसँगको अन्तरक्रियाका लागि लामिछाने चितवन आएका हुन् ।

उनले चितवन ओर्लिनेबित्तिकै बिहीबार पत्रकारहरूसँगको संक्षिप्त कुराकानीमा सरकारको पछिल्लो कदमप्रति असन्तुष्टि पोखेका थिए ।

सरकारले नेपाल प्रहरीका आईजीपी दानबहादुर कार्कीलाई अकस्मात् जिम्मेवारीबाट हटाइनुको औचित्य सरकारले पुष्टि गर्नुपर्ने उनले बताएका थिए ।

हालै राज्यसत्ताको आडमा सञ्चार गृहभित्रै प्रहरी पसेर पत्रकारहरूलाई गिरफ्तार गरिएको घटनाप्रति उनले कडा शब्दमा विरोध जनाएका छन् ।

लामिछानेले लोकतन्त्र र अभिव्यक्ति स्वतन्त्रतामाथिको यो ठाडो हस्तक्षेप भएको बताए । आफ्नो दल लोकतन्त्र र स्वतन्त्र प्रेसको पक्षमा दृढतापूर्वक उभिँदै उनले सरकार सञ्चालनमा देखिएको यो अपरिपक्वता स्वीकार गरे र नेतृत्वलाई परिपक्व बन्न सचेत समेत गराएका थिए ।

सभापति लामिछानेले चितवनबाट सरकारको व्यवहारप्रति प्रश्न उठाएको केही समयपछि प्रधानमन्त्री बालेन शाहले आफ्नो आधिकारिक फेसबुक पेजमार्फत एउटा अर्थपूर्ण स्टाटस सार्वजनिक गरेका थिए ।

उनले लेखेका थिए– देश जोगाउने र पार्टी जोगाउनेमा फरक हुन्छ ।

सामाजिक सञ्जालमा र राजनीतिक वृत्तमा कतिपयले यसलाई लामिछानेप्रति लक्षित समेत मानेका छन् ।

शुक्रवार चितवनमा आफ्ना कार्यकर्तामाझ सम्बोधन गर्दै सभापति लामिछानेले पार्टीका नेता–कार्यकर्ताको व्यवहार तथा कार्यशैलीमाथि तीव्र असन्तुष्टि व्यक्त गरे ।

उनले भने, ‘१८२ सिट छ भन्दैमा हाम्रो भुइँमा खुट्टा छैन । हामी तलदेखि माथिसम्म मातिएका छौँ । मान्छेलाई मान्छे गनेका छैनौँ ।’

जनमतले ठूलो पार्टी बनाउँदैमा वा हातमा पुलिस र प्रशासन छ भन्दैमा दम्भ देखाउने छुट कसैलाई नभएको लामिछानेले बताए ।

समाजले सत्य कुरा ऐना देखाउँदा त्यही समाज र मिडियामाथि जाइलाग्ने प्रवृत्ति राजनीतिक चरित्र हुन नसक्ने तर्कसमेत गरे । सरकारको आडमा मन्त्री र माननीय बनेका केही नेताहरूले जमिनको यथार्थ बिर्सिएको गुनासो गरे ।

‘हेर्दाहेर्दै माननीय भएका साथीहरूले तलका मान्छेलाई देख्दै नदेखेको जस्तो गरेर हिँडिरहनुभएको छ,’ उनले भने, ‘जनताले दिएको यो ऐतिहासिक अभिमत जनताकै हुर्मत लिनका लागि उपयोग नगर्नुहोला, जनताले सबै नियालिरहेका छन् ।’