पोखराको लेकसाइडमा आयोजित १९ औं संस्करणको भाइटिका महोत्सवमा विभिन्न देशका ५१ पर्यटकले टिका लगाएका छन् । होटल संघ पोखरा नेपालले तिहारको अवसरमा बुधबार यो कार्यक्रम आयोजना गरेको हो ।

रेन्वो चिल्ड्रन होम नेपालका छात्राहरुले विदेशी पर्यटकलाई टिका लगाइदिएका हुन् । यस अवसरमा अमेरिका, वेलायत, चीन, जापान र अष्ट्रेलिया लगायत विभिन्न १५ देशका पर्यटकले टिका ग्रहण गरेका हुन् ।

टिका लगाएपछि लिथुएनियाकी पर्यटक मोनिकाले आफ्नो अनुभव सुनाइन् । उनले भनिन्, ‘नेपाली जनता र तिहारको सांस्कृतिक पक्ष मलाई मन पर्यो । मर्दि हिमाल पदयात्राका क्रममा मैले राम्रोसँग हिमाल देख्न नपाए पनि पदयात्रा निकै स्मरणीय बन्न पुग्यो ।’

टिका ग्रहण गरेपछि महिला पर्यटकलाई पछ्यौरा र पुरुषहरुलाई ढाका टोपी उपहारस्वरुप प्रदान गरिएको थियो । त्यस अवसरमा पर्यटकले देउसी खेले र नाचगानमा समेत रमाए । उनीहरुले सेलरोटी चाखे ।

संस्कृतिका माध्यमबाट पर्यटन प्रवर्द्धन गर्ने र आपसी भाइचारा अभिवृद्धि गर्ने उद्देश्य महोत्सवले लिएको आयोजक संघका अध्यक्ष लक्ष्मण सुवेदीले बताए । संघले भाइटिकालाई महोत्सवका रुपमा निरन्तरता दिएपछि पोखराका विभिन्न होटलमा समेत पर्यटकलाई टिका लगाउने कार्यक्रम भएको जानकारी उनले दिए ।