पोखरा । पृथ्वीनारायण क्याम्पस गेट परिसरमा प्रहरी र विद्यार्थीबीच झडप भएको छ । नेपाल विद्यार्थी संघको केन्द्रिय कार्यक्रम अन्तर्गत बुधबार साँझ मसाल जुलुस निकालेको थियो । मसाल जुलुस निकाल्न लाग्दा प्रहरीले क्याम्पस गेटमै पुगेर हस्तक्षेप गरेपछि झडपको अवस्था सिर्जना भएको हो ।

यसअघि, गत जेठ २९ र २०७४ माघ २८ गते पनि नेविसंघ र प्रहरीबीच झडप भएको थियो । जेठमा सरकारले पेट्रोलियम पद्धार्थमा गरेको चरम मूल्यवृद्धिको विरोधमा प्रमुख प्रतिपक्षी दल काँग्रेस समर्थित विद्यार्थी संगठन नेवि संघले निकालेको मसाल जुलुसमा यसैगरी प्रहरीले अवरोध गर्दा रणभूमि बनेको थियो । पत्रकार प्रकाश ढकाल समेत घाईते भएका थिए । त्यस्तै, गतवर्ष माघ २२ गते स्याङ्जा आँधीखोलाका नेविसंघ स्याङजा पिएन क्याम्पस सम्पर्क समितिका सभापति बोधराज ढकालको पोखरा बगरमा बसले किचेर मृत्यु हुँदा पनि नेवि संघ आन्दोलित थिए ।

आज पनि प्रहरीले हस्तक्षेप गरेपछि विद्यार्थीले ढुंगामुढा गरे । प्रहरीले अश्रुग्याँस नै प्रहार गरेको विद्यार्थी बताउँछन् । झडपमा परि नेविसंघका ४ जना घाईते भएका छन् । गोविन्द नेपाली, राज आचार्य, अमृत पौडेल, भरत पोखरेल अञ्जान घाइते भएको नेविसंघले जनाएको छ । उनीहरुको पश्चिमाञ्चल क्षेत्रीय अस्पतालमा उपचार भैरहेको छ ।

काँग्रेस नेतृ सरस्वी गुरुङ, नेवि सघंका नेता सरोज केसी लगायत अस्पताल पुगेर घाईतेको अवस्थाबारे जानकारी लिएका छन् । कास्की प्रहरीले भने प्रहरीले कुनैपनि हस्तक्षेप नगरेको बताएको छ । विद्यार्थीले नै ढुंगामुढा गरेको तर प्रहरीले कुनै प्रतिकार नगरेको प्रहरीको दाबी छ । मसाल जुलुस निकालेपछि कोणसभा गरिएको छ ।

सम्बन्धित समाचार:

http://gandaknews.com/jhadap-nebisang/