पोखरा । विगतमा देशलाई अँध्यारोमा राखेका व्यक्तिहरुले मिडिया परिचालन गरेर आफु र प्राधिकरणको बारेमा झुटो प्रचार गरेको बताउँदै नेपाल विद्युत प्राधिकरणका प्रमुख कार्यकारी निर्देशक (सीईओ) कुलमान घिसिङले ती व्यक्तिहरुले फेरी नेपालमा लोडसेडिङ गराउने प्रयास गरेको आरोप लगाएका छन् । सोमबार काठमाडौंमा पत्रकार सम्मेलन गर्दै घिसिङले देशमा लोडसेडिङ ल्याउन बिभिन्न चलखेल सुरु भएको बताएका हुन् ।

‘विगतमा प्राधिकरणलाई घाटामा पु¥याएर देशलाई अँध्यारोमा राखेका व्यक्तिहरुलाई अहिले देशमा लोडसेडिङ नहुँदा मन परेको छैन’ उनले भने, ‘अहिले हामी हरेक समय देशमा उज्यालो ल्याउनका लागि लागिरहेका छौँ । तर, केहि व्यक्ति र मिडियाको परिचालन गरि हाम्रो प्राधिकरण र म माथि आपेक्ष लगाउने काम भईरहेको छ ।’

‘मैले ६० लाख भत्ता बुझेको छैन’

बिभिन्न सञ्चारमाध्यमा आफुले गैरकानूनी रुपमा ६० लाख भन्दा बढी भत्ता बुझेको भन्दै प्रकाशन भएको समाचार गलत भएको उनले दाबी गरेका छन् । ‘गैरकानुनी रुपमा मैले ६० लाख भन्दा बढी भत्ता लिएको भन्ने समाचार सत्य होईन’ घिसिङले भने, ‘मैले ६० लाख भत्ता बुझेको छैन, राम्रो गरेको भनेर सरकारले मूल्यांकन गरेर महिनाको २ लाख प्रोत्साहन रकम दिएको मात्रै हो ।’

ऊर्जा मन्त्रालयको सहसचिवको नेतृत्वमा बन्ने समितिले यस्तो मूल्यांकन गर्ने भन्दै आफूले गत वर्ष ८९ प्रतिशत नम्बर पाएको उनले बताए । ‘मैले सरकारले प्रोत्साहन स्वरुप दिएको २४ लाख र करबाहेक ६ लाख भत्ता बुझेको छु’ उनले भने, ‘ प्राधिकरणले पारदर्शितालाई पहिलो मन्त्र मानेर काम गरेको छ । तरपनि मेरो गलत कुरा प्रचार गरी व्यक्तिगत आक्षेप लगाइएको छ ।’ आफ्नोविरुद्ध खेल गर्नेहरुसँग प्राधिकरणभित्रका केही कर्मचारीको पनि मिलोमतो रहेको उनको दाबी छ । अब तलबलाई पनि भत्ता भन्दिने अवस्था अँएको भन्दै उनले दुःख व्यक्त गरे ।