पोखरा : तथ्यांक विभागले तेस्रो चरणमा २०७४ असारदेखि २०७५ जेठसम्म गरेको नेपाल श्रमशक्ति सर्वेक्षण अनुसार गण्डकी प्रदेशमा अझै ६० हजार जनसंख्या बेरोजगार रहेका छन् । विभागले गरेको सर्वेक्षण अनुसार प्रदेशको ११ जिल्लामा १८ लाख ६८ हजार श्रमशक्ति रहेको मध्य हाल ६० हजार जनसंख्या बेरोजगार रहेका   हुन् ।
१५ वर्षदेखि माथी उमेर समुहको जनसंख्या १८ लाख ६८ हजार रहेको गण्डकी प्रदेशमा ३ लाख ४० हजार पुरुष र २ लाख ६६ हजार महिला गरी जम्मा ६ लाख ६ हजार जना मात्रै रोजगार छन् । तर, तथ्यांक विभागले बैदेशिक रोजगारीमा जानेहरूको तथ्यांक उल्लेख गरेको छैन ।  हाल प्रदेशमा ४५ हजार शहरी र १५ हजार ग्रामिण क्षेत्रमा बेरोजगार छन् ।
नियुक्ति पत्र नदिई काममा लगाउने बढि
गण्डकी प्रदेशमा रोजगार भएका मध्य अघिकांस नियुक्ति पत्र बिनै काम गर्ने गरेको पाईएको छ । ६ लाख ६ हजार जना रोजगार संख्या भएकामध्य ३ लाख ६६ हजारले अझै नियुक्ति बिनै काम गरिरहेको पाईएको हो ।
नियुक्ति पत्र बिना काम गर्ने कामदारहरुको तलवदेखि सामाजिक सुरक्षासमेत ग्यारेन्टी हुँदैन । अनौपचारिक रुपमा नियुक्ति बिना काम गराउँदा राज्य र कामदार दुबैले घाटा ब्यहोर्नु पर्ने देखिन्छ ।