पोखरामा रियल जुसमा लेदो भेटिएको छ । पृथ्वी चोकमा रहेको बाबा जुसमा विनोद खड्का लगायतले जुस पिउन खोज्दा जुसमा लेदो फेला पारेका हुन् । ‘मैले जुस पिउँदा स्ट्रबाट कालो पदार्थ मुखमा आयो खोलेर हेर्दा भित्र लेदो देखियो’ खड्काले भने ।

एक लिटरको रियल जुसमा कालो देखिने लेदो भेटिएको हो । आफुलाइ निकै गर्मी भएपछी जुस मगाएको र खादा रियल जुसबाट निकै गन्ध आएको बताए । ‘हामीले मिति हेरेर दिएका थियौ, तर जुस अखाद्य रहेछ,’ बाबा जुसका संचालक सन्तोष जसवालले बताए ।

बहुराष्ट्रिय कम्पनी डाबर नेपालद्वारा उत्पादित रियल जुस फेरि विवादित बनेको हो । जयसवालका अनुसार पोखराका डिलरलाइ खबर गर्दा जुसको बट्टामा प्वाल परेको भन्दै फर्किएका छन् । आम जनताको स्वास्थयमाथि खेलबाड गर्ने कम्पनीलाई कार्वाही गर्नुपर्ने उनीहरुको भनाई छ ।

अत्याधिक गर्मीको कारण पोखरामा पछिल्लो समय जुसको व्यापार बढ्दो छ । स्वास्थ्यको लागि समेत निकै फाइदाजनक मानिने जुसमा पटक पटक अखाद्य बस्तु भेटिँदा समेत कार्वाही हुन सकेको छैन । उच्च गुणस्तरको पेय पद्धार्थ भन्दै बिक्री हुने जुसमा अखाद्य वस्तु फेला परेको विषयमा राज्यले कस्तो छानविन र कारवाही गर्छ, त्यो भने हेर्न बाँकी छ ।