पोखरा । पोखरा महानगरपालिका वडा नं. २१ का अध्यक्ष खगराज आचार्यलाई दुव्र्यवहार सहित कुटपिट गरिएको छ । कास्की निर्मलपोखरी घर भई पोखरा १७ बिरौटा बस्दै आएका आचार्य थरकै दातारामले अघि साँझ कुटपिट गरेका हुन् ।

कुटपिटमा संलग्न दातारामलाई वडा प्रहरी कार्यालय बैदामले नियन्त्रणमा लिएको डिएसपी कोमल शाहले जानकारी पुष्टि गरेका छन् । ‘राष्ट्रबैंकचोकमा कुटपिट भयो भन्ने जानकारी आएपछि हामीले नियन्त्रणमा लिएर आयौं ।’ – डिएसपी शाहले भने – ‘उहाँ खानेपानी आयोजनाका अध्यक्ष पनि हुनुहुँदो रहेछ । मलाई चित्त नपरेर गाली चाहिँ गरेको हुँ पिटेको हैन भन्नुहुन्छ । अनुसन्धान जारी छ ।’ पोखरा राष्ट्रबैंकचोक स्थित जुस पसलमा रहेका बेला दुव्र्यवहार र कुटपिट भएको बताइएको छ ।

के भन्छन् वडा अध्यक्ष खगराज आचार्य ?

‘आज पौने ५ बजेतिर म कार्यालयबाट निस्केँ । फुस्रेखोला, कृस्ति, निर्मलपोखरी, भरतपोखरी सडक अन्तर्गत मैदान खण्डमा भोलि पिच हुने भएकाले प्राविधिक सहित लिएर निरिक्षणमा गएँ । ६ बजेतिर फर्कियौं । राष्ट्रबैंक चोक नजिकै गाडी रोकेर जुस पसलमा पुग्यौं । त्यहाँ रहँदा रहँदै एक्कासी ममाथि मुक्का बर्सियो । मलाई नदेख्ने गरी आएर हानेको हो । एक चोटी हानेपछि पछाडि हेर्न लागेको सकिनँ, अर्को मुक्का पनि हान्यो । हेल्मेटले हान्न खोज्दै थियो । म जनप्रतिनिधिले केही गर्न मिलेन मलाई बचाइदिनुस् भनेर म कराएँ । ५ मिनेट जति नै दाताराम बसेर नानाथरी गाली गरे । कोहि आएनन् । जुस पसलका साहुले पनि बचाउ गरे । केही चिनेकाले समातेर बाहिर लगे । प्रहरी बोलाएर उसलाई लग्यो । डिएसपी साब आफै आउनुभयो । बाटोमा फेरि फोन गरेर तलाई घरमै आएर मार्छु भनेर समेत भन्दै थियो । यो कुरा इन्स्पेक्टरले समेत सुनेको छ । रक्सी पिएर मातेर आएर मलाई हानेको हो ।’

कारण के ?

कुटपिटमा संलग्न दाताराम आचार्य कृस्ती–निर्मलपोखरी–भरतपोखरी सहलगानी खानेपानी आयोजनाका अध्यक्ष समेत रहेको डिएसपी शाहले जनाएका छन् । आफ्नो गाउँविकासमा खगराज आचार्यको सक्रियता अलि बढी नै रहेको छ । तर, दातारामको फेसबुक हेर्दा उनले पनि गाउँतिरका लागि केहि गर्न खोजेको देखिन्छ । जनप्रतिनिधिको कामप्रति चित्त नबुझेको उनका स्टाटसहरु छन् ।