पोखरा । पोखरा महानगरपालिकाले भदौ १ गतेदेखि महानगरपालिका भित्र सञ्चालन हुने सार्वजनिक यातायातका बसहरुमा ई–टिकेटिङ लागु गर्दैछ । शुक्रबार सफल परिक्षण गरिएसंगै शनिबार पोखरा महानगरका प्रमुख मानबहादुर जिसी र उपप्रमुख मञ्जुदेवी गुरुङले पोखराका बसमा मेट्रो कार्ड प्रयोग गरेका छन्। शुक्रबार पोखरा सिम्पानीदेखि हिमालयन आँखा अस्पताल रुटका १३ वटा बसमा ई टिकेट सिष्टमको परिक्षण भएको थियो ।

मेयर, उपमेयरको साथमा विभिन्न बस कम्पनीका अध्यक्ष एवं संचालक सहितको टोली पनि सहभागी थिए । उनीहरुले नगर बसमा यात्रा गदै कार्डमार्फत नै भाडा तिरेका थिए ।

पृथ्वीराजमार्ग बस सञ्चालक कम्पनी प्रालिका अध्यक्ष योगेन्द्र बहादुर केसीले भदौ १ गते भित्र पोखरा उपत्यकामा चल्ने सम्पूर्ण बसहरुमा उक्त सिस्टम जडान गर्ने जनाए । पोखरा बस कम्पनी प्रालिका सञ्चालक सदस्य अमृत शर्मा तिमिल्सिनाले महानगरले भनेको अवधिभित्रै सबै बसमा यो सेवा सुरु भइसक्ने जानकारी दिए । यो सिष्टमको निर्माण कम्पनी एनक्लाउड कम्पनीका सिइओ दिपेन्द्र नारायण श्रेष्ठले वैशाखदेखि सुरु गर्ने भनिएपनि विविध कारणले हुन नसकेको जनाउँदै भदौ १ देखि लागू हुने हुँदा अब सबैले यो सेवा प्रयोग गर्न सुझाव दिए ।

पहिलो चरणमा पोखरा भित्रका स्कुल, कलेज अध्ययन गर्ने बिद्यार्थीहरु माझ वितरण शुरु गरिएको र लगत्तै पोखरा महानगर भित्रका सम्पूर्ण वडाहरु मार्फत सो कार्ड वितरण गरिने श्रेष्ठले बताए ।

पोखरा महानगरपालिका भित्र चल्ने करीब ८०० सवारी साधनमा टर्मिनल जडान गर्ने र ४ वर्ष भित्रमा ३ लाख स्मार्ट कार्ड वितरण गरी पोखरालाई स्मार्ट सिटीको रुपमा विकसित गर्ने पोखरा महानगरपालिकाको अवधारणा छ । पहिलो चरणमा १० हजार कार्ड निःशुल्क रुपमा वितरण गरिने भएको छ ।

भाडामा छुट, विद्यार्थी सहुलियत पनि

थोरै पैसा भाडा फिर्ता नहुने समस्या अब टर्ने भएको छ । यो सिस्टम लागु भएसंगै आर्थिक पारदर्शीतÞा हुनेछ । कार्ड प्रयोगकर्तालाई सहुलियत स्वरूप पोखरा बस कम्पनीले चढ्न साथ लागु हुने न्यूनतम भाडा १४ रुपैयामा १ रुपैया घटाएर १३ रुपैया लिने संचालक तिमिल्सिनाले जनाए । यसैगरी, २० रुपैया भाडा लाग्ने ठाउँमा २ रुपैया छुट, ४० रुपैँयासम्मको भाडामा ४ रुपैँया छुट र ५० रुपैँयासम्म भाडा लाग्ने ठाउँमा ५ रुपैँया छुटको व्यबस्था गरेको उनले बताएका छन् । विद्यार्थी सहुलियत पनि पाईनेछ ।

कार्ड कसरी लिने ?

कार्ड प्राप्त गर्न एउटा पासपोर्ट फोटो र एक प्रति परिचय खुल्ने परिचयपत्रको फोटोकपी आवश्यक पर्नेछ । कार्डमा १०० रुपैंया ब्यालेन्स हुन्छ र सोका लागि १ सय रुपैंया नै बुझाउनुपर्नेछ । पछि कार्ड फिर्ता गरेको खण्डमा सो पैसा पुनः पाईनेछ । मेट्रो कार्ड आईतबारबाटै बाँड्न सुरु हुने महानगरले जनाएको छ । यसका लागि ३३ वटै वडामा सम्पर्क गर्न अनुरोध पनि गरेको छ । साथै बस कम्पनी कार्यालयमा पनि उपलब्ध हुनेछ । कार्डमा १ सय रुपैंयादेखि १ हजार रुपैंयासम्म ब्यालेन्स राख्न सकिनेछ । बसभित्रै सहचालक मार्फत पनि कार्डमा पैसा भर्न सकिनेछ ।

कसरी पैसा काटिन्छ ?

सहचालकसँग बसमा भाडा तिर्दा सिष्टम मेसिन स्मार्ट पोष्ट डिभाइस हुन्छ । उक्लँदा मेसिनमा एटिएम कार्ड झैं छुने र झर्ने वेलामा पछि उक्त मेसिनमा छुँदा चढेको र झरेको स्थानका आधारमा कार्डबाट पैसा काटिनेछ ।

असोज ३ भित्र सिष्टम जडान हुने बस सञ्चालनमा रोक

आगामी असोज ३ गतेसम्म सम्पूर्ण सवारी साधनहरुमा ईटिकेटिङ प्रविधि लागू गर्न समय प्रदान गरिएको छ । यदी यस अवधिभित्र पनि सिष्टम जडान नगरेमा कारबाही भोग्नुपर्ने महानगरले जनाएको छ । महानगरलाई स्थानिय शासन संचालन ऐन अन्तर्गत त्यस्ता सवारी साधन संचालनमा रोक लगाउन सक्ने अधिकार छ ।

http://gandaknews.com/e-ticketing/

http://gandaknews.com/e-ticket/