विराटनगर । जिल्ला अदालत सुनसरीमा आत्मसमर्पण गरेका सिद्धबाबा भनिने कृष्णबहादुर गिरी कारागार चलान भएका छन् । उच्च अदालत विराटनगरको आदेशपछि फरार भएका गिरी मंगलबार सुनसरी अदालतमा हाजिर भएका हुन् ।

हाजिर भएलगतै गिरीलाई उच्च अदालतको आदेश कार्यान्यनका लागि थुनुवा पूर्जी थमाएर क्षेत्रीय कारागार झुम्कामा पठाइएको जिल्ला अदालत सुनसरा निमित्त श्रेस्तेदार निधीराम दाहालले जानकारी दिए ।

उनका अनुसार गिरीले आफू भारतमा उपचारका लागि गएको र फर्कने क्रममा उच्च अदालतको आदेशको बारेमा जानकारी भएपछि अदालतमा हाजिर भएको निवेदनमा उल्लेख गरेका छन् ।

गिरीमाथि कात्तिक ४ गते राति महिला अनुयायीलाई आफ्नै कोठासँगै रहेको बैठक कक्षमा बोलाएर करणी गरेको आरोप छ । काठमाडौं बस्दै आएकी महिला अनुयायीले उजुरी गरेपछि गिरी मंसिर दोस्रो साता पक्राउ परेका थिए ।

पक्राउ पछि गिरीले प्रहरीको हिरासतमा बस्नुपर्ने समय अवधी विराट नर्सिङहोमबाट नै कटाए । पक्राउ पर्नुअघि नर्सिङहोम भर्ना भएका गिरी जिल्ला अदालत सुनसरीको आदेशको पुस १४ गतेको आदेशपछि तीन लाख रुपैयाँ धरौटी बुझाएर छुटेका थिए ।

गिरीलाई कारागारको ब्लक ए मा राखिएको छ । कारागार चलान हुने क्रममा हिड्न नमानेका गिरीलाई गाडीमै ब्लक ए सम्म पुर्‍याइएको थियो ।