पोखरा । झण्डै ३२ वर्ष अघि २०४५ सालमा निर्माण भएको पोखराको एकमात्र सभागृह ‘दीपेन्द्र सभागृह’ । राजनीतिक परिवर्तनसँगै सभागृहको नाम अघिको ‘दीपेन्द्र’ हट्यो, ‘पोखरा’ जोडियो । तर, सभागृहको हालत झन् लथालिंग । स्मार्ट सिटीको नारा लगाएको पोखरा महानगरपालिका मातहत नै छ यो सभागृह । तर, जनप्रतिनिधि चुनिएको ३ वर्ष बितिसक्दा समेत न त यसको मर्मत भएको छ, न त नवनिर्माण । छानो चुहिन्छ, ठाउँ ठाउँमा भ्वाङ । सयौं कुर्सी भाँचिसकेको । रंग उडेको भित्तो, डुङडुङ्ती गन्हाउने चर्पी, घाँसले छोपिएको परिसर । पोखरा सभागृहको अहिलेसम्मको रुप यस्तै हो ।

तर, तीन दिनमै पोखरा सभागृहको स्वरुप फेरिँदैछ । यसको कारण हो, कोरोना महामारी । जसको संक्रमणबाट बच्न र सावधानी अपनाउन गण्डकी प्रदेश सरकारको प्रदेशसभा नै यही सभागृहमा बस्दैछ । नदिपुर स्थित प्रदेश संसद भवन साँघुरो भएको कारण पोखरा सभागृहलाई फाइदा मिलेको हो । कोरोना भाइरसका कारण सावधानीपूर्वक र सामाजिक दुरी कायम गरी संसद चलाउनुपर्ने भएकाले पोखरा सभागृह चयन गरिएको हो ।

https://www.facebook.com/gandaknews/videos/1341056789616794/

मुख्यमन्त्री, पोखरा महानगरपालिकाका प्रमुख र प्रदेश सभामुखको छलफलपछि वैशाख ११ गतेबाट गण्डकी प्रदेशको बजेट (बर्खे) अधिवेशन पोखरा सभागृहमानै सञ्चालन गर्ने निधो भएपछि धमाधम सभागृह मर्मत सम्भार भइरहेको छ । बर्खे अधिवेशन ११ गते आह्वान गर्ने निर्णय गण्डकी प्रदेश मन्त्रिपरिषदको ४ जेठको बैठकले गरेको थियो । यो अधिवेशनमा सरकारले आगामी आर्थिक वर्षका लागि नीति तथा कार्यक्रम र बजेट प्रस्तुत गर्नेछ । यसअघि २३ पुसमा सुरु भएको प्रदेशको हिउँदे अधिवेशनको अन्तिम बैठक चैत ६ गते डाकिएकोमा सूचना टाँसेर स्थगित भएको थियो ।

भोलि आइतबारसम्म ठाउँ तयार गरिसक्नुपर्ने भएकाले रातदिन काम भइरहेको छ । प्रदेशको भौतिक पूर्वाधार विकास मन्त्रालयले पोखरा सभागृह मर्मत सम्भार गरिरहेको हो । भौतिक पूर्वाधार मन्त्री रामशरण बस्नेत आफै सभागृहमा निर्देशन दिइरहेको भेटिन्छ । सभामुख, मुख्यमन्त्री, दलका नेताका आसन तयार गर्ने, दलको कार्यालय, कार्यव्यवस्था समितिको बैठक स्थल, रोस्टमका कुर्ची फेर्ने, रङ लगाउने, शौचालय तयार गर्ने, बत्ती हाल्ने, इन्टरनेट जडान लगायतका काम भइरहेका छन् । भाँच्चिएका कुर्चीले पनि नयाँ रुप पाएका छन् । भित्ता र सिलिङमा पनि सम्भव भएसम्म रंगरोगन गरिएको छ ।

२५ लाख बढी खर्च लाग्ने अनुमान गरिएको छ । सभागृह मर्मत खर्च प्रदेश सरकारले नै व्यहोर्ने निर्णय भइसकेको छ । गण्डकी प्रदेशमा ६० जना सांसद छन् । सांसदहरुलाई २ कुर्सी छाडेर बस्ने व्यवस्था मिलाईंदैछ । सभागृहको माथिल्लो हलमा दर्शकदीर्घाको व्यवस्था गरिने भएको छ । माथिल्लो हलमा पत्रकार र दर्शक जाने तथा तल्लो हलमा सांसदहरू प्रवेश गर्ने ढोका पनि छुट्टाछुट्टै हुनेछन् ।

नदीपुरको प्रदेश सभामा जस्तो सांसदका लागि माइकको व्यवस्था हुनेछन् । सत्ता पक्ष र प्रतिपक्षका निम्ति दुईतिर माइकको व्यवस्था मिलाइएको छ । बोल्न समय लिने सांसदले आफ्नोतिरको माइकमा गएर बोल्ने छन् । तर, टेबल ठोक्ने सुविधा भने हुनेछैन ।

कोरोना भाइरसको संक्रमणका कारण दर्शकदीर्घामा ठूलो भिड हुन नदिने विधि अपनाएको छ । बजेट अधिवेशनमा धेरै जनालाई नबोलाउने तर युट्युबमार्फत प्रत्यक्ष प्रशारण गर्ने भएको हो । प्रदेश सभा सभामुख नेत्रनाथ अधिकारीले बर्खे अधिवेशन पूरै सभागृहमा सञ्चालन गरिने जनाएका छन् ।