गण्डकी प्रदेश स्वास्थ्य निर्देशनालयले सोमबार निकालेको सूचनाअनुसार पोखराको वडा नं. ५ का पुरुष र वडा नं. २६ का महिलामा कोरोना संक्रमण पुष्टि भयो । पोखरा २६ मा देखिएको कोरोना संक्रमित वडा कार्यालय २७ मा काम गर्ने ४० वर्षीया महिला कार्मचारी भएको खुलेको छ ।

वडा नं. २७ का कर्मचारीमा कोरोना संक्रमण भएलगत्तै महानगरले कार्यालय परिसर सिल गरेको छ । कर्मचारीमा कोरोना पुष्टि भएसँगै कार्यालय आगामी ३० गतेसम्मका लागि बन्द गरिएको महानगर श्रोतले जनाएको छ ।

कर्मचारीमा कोरोना पुष्टि हुने बित्तिकै वडाबाट प्रदान गरिने सेवा प्रवाहलाई ३० गतेसम्म बन्द गर्न महानगरले पत्र पठाएपछि कार्यालय बन्द भएको छ ।

तालचोक स्थित साविक लेखनाथ नगरपालिका रहेको भवनमा पोखरा वडा नंं २७ को कार्यालय राखिएको छ । यो भवन परिसरमा पनि अब अत्याधुनिक बाल हस्पिटल सञ्चालन गर्ने तयारी अगाडि बढाइसकिएको छ ।