मन्त्रिपरिषद् पुनर्गठन हुने भएपछि नेकपाका दुई अध्यक्ष केपी शर्मा ओली र पुष्पकमल दाहाल प्रचण्ड छलफलमा व्यस्त छन् । प्रधानमन्त्री बाहेक सबै एकसाथ हटाएर पुनः गठन गर्ने कि ? केही मन्त्री हटाएर नयाँ नियुक्त गर्ने विषयमा सहमति जुट्न सकिरहेको छैन । मन्त्रालय नै फुटाएर भएपनि संविधानतः बढीमा २५ मन्त्रालय बनाउन पनि सकिने गरी दुई अध्यक्ष सहमत छन् । कम्तिमा ५ जना र बढीमा १२ जना नयाँ अनुहार क्याबिनेटमा भित्रनेछन् ।

कोरोना महामारीमा प्रभावकारी रुपमा काम गर्न नसकेको भन्दै स्वास्थ्य तथा जनसंख्या मन्त्री भानुभक्त ढकाललाई पनि हटाउनुपर्ने आवाज नेकपाभित्र उठिरहेको छ। अध्यक्ष प्रचण्डसहित नेकपाका नेता माधवकुमार नेपाल र झलनाथ खनाल पनि ढकाललाई हटाउनुपर्ने पक्षमा छन्।

पूर्वस्वास्थ्यमन्त्री खगराज अधिकारीलाई पुनः सोहि जिम्मेवारी दिने विषयमा पनि नेकपाका केही नेताहरुले छलफल चलाएका छन् । अधिकारी पनि आफूले विगतको अनुभवका आधारमा सन्तोषजनक काम गर्न सक्ने भन्दै मन्त्री बन्न इच्छुक छन् ।

खगराज केपी शर्मा ओलीकै पक्षका हुन् । तरपनि प्रधानमन्त्री ओली ढकाललाई नै सकेसम्म निरन्तरता दिने पक्षमा छन् । स्वास्थ्यमन्त्री ढकाल अधिकारीसँग रुष्ट बनेका छन् । नेकपा केही नेताहरुका अनुसार एउटै गुटका भानुभक्त र खगराजबीच बोलचाल नै हुन छोडिसकेको छ ।

महासचिव विष्णु पौडेल ढकाललाई हटाउनै नहुने पक्षमा छन् । तर, खगराजको पक्षमा प्रदेश नं. ५ का मूख्यमन्त्री शंकर पोखरेल छन् । पर्फमेन्स पनि नभएको र खगराज पनि आफ्नै पक्षमा रहेकाले खगराजलाई नै स्वास्थ्यमन्त्री बनाउन पोखरलले भनिरहेका छन् । प्रचण्ड भने उर्जा मन्त्रालय सम्हाल्दा राम्रो काम गरेका जनार्दनलाई स्वास्थ्य मन्त्रालयको जिम्मेवारी दिनुपर्ने चाहना राखेका छन् ।