मनाङ नासो गाउँपालिकाको थोचेमा मंगलबार रातिदेखि लागेको आगो नियन्त्रणमा आउन सकेको छैन । आगोले बृहत् रुप लिन थालेपछि बुधबार बिहानैदेखि स्थानीय, नेपाल प्रहरी, सशस्त्र प्रहरी, नेपाली सेनालगायतको टोली आगो निभाउन दिनभर खटेको थियो । टोलीलाई मानव बस्ती जोगाउन हम्मेहम्मे परेको छ । मानव बस्ती भएको वडा नं. ६ र ७ को तिल्चेनजिक आगो पुग्न लागेको छ भने वडा नं ५ थोंचे खतरामुक्त रहेको छ ।

आगो मानव बस्तीनजिकै आइपुगेकाले नियन्त्रणमा लिने प्रयासमा लागेको प्रमुख जिल्ला अधिकारी विष्णु लामिछानेले बताउनुभयो । आगलागी के कति कारणले भयो भन्ने पत्ता नलागेको उहाँले बताउनुभयो । उनले प्रहरी, सेना, सशस्त्र प्रहरी तथा स्थानीय मिलेर अग्नि रेखा तयार पारी बस्ती जोगाउने प्रयास गरिरहेको बताए ।

आगो मानव बस्तीबाट एक सय मिटर नजिकै आइपुगेकाले नियन्त्रणमा लिने प्रयास भइरहेको प्रजिअ लामीछानेको भनाई छ । उनले भने ‘सेना, प्रहरी, सशस्त्र प्रहरी तथा स्थानीयले अग्नि रेखा तयार पारी बस्ती जोगाउने प्रयास गरेका छन् ।’

भिरालो भौगोलिक बनावटका कारण आगो नियन्त्रणमा लिन कठिन भएको प्रजिअ लामीछानेले बताए । थोचे, तिल्चे र ताचैको वनमा आगो दन्कन थालेपछि आफूहरु त्रसित भएको तिल्चेका स्थानीय श्रीमाया घलेले बताइन् ।

मंसिर ११ गतेदेखि लागेको आगो नियन्त्रणमा आएपनि फेरि आगो लागेपछि स्थानीय जंगल जलेर सकिने हो कि भन्ने चिन्तामा छन् । आगलागी के कति कारणले भयो भन्ने एकिन हुन सकेको छैन ।