खाद्य व्यवस्था तथा व्यापार कम्पनी लिमिटेड शाखा कार्यालय वीरगञ्जले चालू आर्थिक वर्षमा प्राप्त गरेको सोना मन्सुली धान खरिद कोटाको लक्ष्य पुग्न नसकेपछि थप ५ हजार क्विन्टल खरिद गर्ने भएको छ ।

शाखाले चालु आर्थिक वर्षका लागि ३० हजार क्विन्टल सोना मन्सुली धान खरिदको कोटा पाएकोमा हालसम्म ९ करोड २१ लाख १ हजार ६५ रुपैयाँ मूल्य बराबरको ३१ हजार २९६ क्विन्टल धान मात्र खरिद गर्न सकेकाले थप ५ हजार क्विन्टल धान खरिद गरी लक्ष्य भेट्ने कार्यालयका शाखा प्रमुख विकास कटुवालले जानकारी दिए ।

कम्पनीले जिरामसिनो धान ५ हजार क्विन्टल खरिद गर्ने लक्ष्य पाएकोमा हालसम्म ३ लाख ३८ हजार ४३० रुपैयाँ मूल्य बराबरको ११७ क्विटल मात्र धान खरिद गर्न सकेको छ । नेपालभन्दा भारतमा जिरामसिनो धान बढी उत्पादन भए पनि आयात हुन नसकेको तथा पर्साका किसानले थोरै मात्रामा जिरामसिनो धानको खेती गर्ने भएकाले खरीद लक्ष्य भेट्न नसकिएको हो ।

जिरामसिनो धानको सट्टा सोना मन्सुली धान खरिद गर्ने भनेर खरिद विभागबाट निर्देशन आएकाले थप ५ हजार क्विन्टल सोना मन्सुली धान खरिद गर्न लागिएको सो कार्यालयका सूचना अधिकारी मुनीलाल कुशवाहले बताए ।

संघीय सरकारले यस वर्ष किसानबाट प्रति  क्विन्टल ७ दशमलव ३५ प्रतिशत बढी मूल्यमा सोना मन्सुली धान तथा ६ दशमलव ५ प्रतिशत बढी मूल्यमा जिरामसिनो धान खरिद गर्न थालेका छन् । सोना मन्सुली धान प्रतिक्विटल २ हजार ८८५ रुपैयाँ तथा जिरामसिनो धान प्रतिक्विटल २ हजार ९०० रुपैयाँमा खरिद गर्न थालेको छ ।

अघिल्लो वर्ष सो कार्यालयले २५ हजार क्विन्टल सोना मन्सुलीधान तथा ३२ क्विन्टल२५ किलो जिरामसिनो धान खरिद गरेको थियो ।

पर्सामा ८५ प्रतिशत किसान धान खेती गर्दै आइरहेका छन् । यस वर्ष पर्साका किसानले ४७ हजार ५० हेक्टर क्षेत्रफलमा धान खेती गरी २ लाख २८ हजार ५६० मेट्रिकटन धान उत्पादन गरेका छन् । अघिल्लो वर्षभन्दा यसवर्ष पर्साका किसानले रु ७ करोड ४४ लाख १७ हजार ६०० मूल्य बराबरको २ हजार ७५० मेट्रिकटन बढी धान फलाएको कृषि ज्ञान केन्द्र पर्साका बाली विकास अधिकृत सुरेशप्रसाद चौरसियाले जानकारी दिए ।