पोखरा । जर्वजस्ती कारणीको आरोपमा मुद्धा खेपिरहेका व्यक्तिको परिवारसँग सेटिङमा रकम असुलेको आरोपमा अधिवक्ता लक्ष्मीप्रसाद घिमिरे पक्राउ परेका छन् । पोखरामा ओम ल फर्म सञ्चालन गरेर बसेका लमजुङका ५८ वर्षीय घिमिरेलाई बैदाम क्षेत्रबाट प्रहरीले बुधबार पक्राउ गरेको हो ।

पोखराकी १७ वर्षीया किशोरीमाथि जबर्जस्ती करणी अभियोगमा एक ५७ वर्षीय पुरुष पक्राउ परेका थिए । ति पुरुषकी श्रीमतीसँग पोखराकै सूर्यलाल खड्का र हेम्जा बस्दै आएका धादिङका कमानबहादुर तामाङले भेटेर रकम दिएमा केस मिल्ने बताएका थिए ।

खड्का र तामाङलाई पक्राउ गरी उनीहरुसँग बयान लिँदा घिमिरेको नाम मुछिएपछि उनलाई पनि पक्राउ गरिएको हो । १२ लाख रुपैयाँको चेक र १ लाख २० हजार नगदसहित दुई जना पक्राउ परेका थिए ।

मुद्धा मिलाएर लाखौं रकम असुल्ने दाउ गरेका खड्का र तामाङले मुद्धा परेर हिरासतमा रहेका पुरुषकी श्रीमतीसँग सेटिङ मिलाउँदै थिए । दबाब, प्रभावमा पार्न खोजेको भन्दै उल्टै आफन्तले प्रहरीकहाँ उजुरी दिएपछि घटना बाहिरिएको हो ।

घिमिरेमाथि ४ दिनको म्याद थप गरेर अनुसन्धान भइरहेको कास्की प्रहरी प्रवक्ता डिएसपी सुवास हमालले जानकारी दिएका छन् । घटनाको अनुसन्धानका क्रममा खड्का र तामाङको सेटिङ अधिवक्ता घिमिरेसँग देखिएकोले उनलाई पक्राउ गरेको प्रहरीले जनाएको छ ।