एसके थकाली । मुस्ताङमा कोरोना भाइरस संक्रमित एक जनाको मृत्यु भएको छ । घरपझोङ गाउँपालिका—४ जोमसोम बस्ने ७२ वर्षीया वृद्धाको बिहीबार राति मृत्यु भएको हो । मुस्ताङमा कोरोनाबाट मृत्यु भएको यो पहिलो घटना हो ।

बिहीबार साँझ उपचारका लागि अस्पतालमा राखिएकोमा राति मृत्यु भएको मुस्ताङ जिल्ला अस्पतालले जनाएको छ ।अस्पतालका मेडिकल सुपरिटेन्डेन्ट मनोज घिमिरेका अनुसार एन्टिजेन परीक्षण गर्दा ती वृद्धको रिपोर्ट पोजेटिभ आएको थियो ।

प्रमुख जिल्ला अधिकारी हिरादेवी पौडेलले कोरोना संक्रमितको मृत्यु भएको पुष्टि गर्दै जिल्लामा आज डिसिसिएमसीको बैठक बसेर जिल्लालाई कसरी सुरक्षित बनाउने भन्ने योजना बनाइने बताइन् ।

कोरोनामुक्त रहेको मुस्ताङमा पछिल्लो हप्तायता संक्रमित भेटिन थालेका छन् । मुस्ताङमा अहिले ४ जना सक्रिय संक्रमित रहेको स्वास्थ्य कार्यालय मुस्ताङले जनाएको छ ।

सरकारले कोरोना परीक्षणका लागि एन्टिजेन प्रविधिलाई मान्यता दिएको छ । प्रदेश स्वास्थ्य निर्देशानालय पोखराले कोरोना लक्षण भएका व्यक्तिलाई एन्टिजेन परीक्षण मार्फत संक्रमित भएरनभएको पत्ता लगाउने अधिकार सुनिश्चित गरेको जोमसोम अस्पतालले जनाएको छ । तर, धेरै हदसम्म कोरोनाको जस्तै लक्षण देखिने तर एन्टिजेन परीक्षण गर्दा रिपोर्ट नेगेटिभ आएमा त्यस्ता बिरामीको स्वाब संकलन गरी पीसीआर परीक्षण गर्न पोखरा पठाउने निर्देशन भएको अस्पतालले जनाएको छ ।

जिल्ला अस्पताल जोमसोमले एन्टिजेन परीक्षण गरिएका व्यक्तिको पीसीआर गर्दा ८० प्रतिशत व्यक्तिको रिपोर्ट सही देखाउने उल्लेख गरेको छ । यो परीक्षण गर्दा बिरामीको रिपोर्ट ३० मिनेटमै नतिजा निकाल्न सक्छ ।