कास्की जिल्लामा पूर्ण लकडाउन गरेसँगै सुरक्षाकर्मीले कडाई पनि गरेको छ । एक हप्तादेखि जारी लकडाउन आजबाट मात्रै कडाई गरिएको हो । वैशाख १५ देखि सुरु निषेधाज्ञामा जोर विजोरका आधारमा सवारी सञ्चालन गर्न दिइएको थियो भने बजार पनि केही खुल्ला नै थिए । आजदेखि भने पोखरा सहितका मूख्य बजार क्षेत्रमा कडाई गरिएको हो ।

कास्की प्रशासनले आजदेखि ३१ गते राति १२ बजे सम्मका लागि थप आदेश सहित निषेधाज्ञा जारी गर्दै कडाई गरेको हो । पोखराका मूख्य सडकहरुमा अत्यावश्यक बाहेकका सवारीमा रोक लगाइएको छ । भित्री गल्ली तथा साना बाटाहरुमा भने कोरोनाको बेवास्ता गरेरै केही साना सवारी चलाएको भेटिन्छ ।

पोखरामा नयाँ भेरियन्टको कोरोना भाइरस सबै वडामा पुगिसकेको स्वास्थ्य निर्देशनालय गण्डकीले जानकारी दिएको छ । संक्रमित र मृतकको संख्या बढिरहेका बेला पनि अझै सुरक्षा निकायको आँखा छल्दै बाहिर सडकमा निस्किरहेको पनि भेटिन्छ ।

प्रहरीले तपाईंको मास्क खै अभियान अन्तर्गत बाटोमा हिँड्नेहरुलाई मास्क पनि वितरण गरिरहेको छ भने बेकाममा डुल्नेहरुलाई घर जान अनुरोध गरिरहेका छन् । नमान्नेलाई होल्डिङ सेन्टरमा उभ्याइएको छ ।

कोरोनाको जोखिमलाई कम गराई चेनब्रेक गर्ने प्रशासनको निर्णय र आदेशलाई पूर्ण रूपमा कार्यान्वयनमा ल्याउनका लागि ६ सय बढी सुरक्षाकर्मी परिचालन गरिएको र विभिन्न २१ वटा चेक पोइन्ट स्थापना गरी चेकजाँच भइरहेको कास्की प्रहरीले जनाएको छ । बिहान मात्रै १ सय बढी सवारी नियन्त्रणमा लिइएको छ । अत्यावश्यक बाहेकका पसलहरु बन्द गराउन प्रहरीहरु सिठ्ठी फुकेरै हिँडिरहेका छन् ।

यसैबीच, पोखरा भित्रने मूख्य नाकाहरुमा यात्रुहरुको बिचल्ली भएको छ । अन्य जिल्लाबाट आएका बसहरु तनहुँसम्म सहज रुपमा आएपनि कास्कीमा निषेधाज्ञा जारी भएकाले सहजै भित्रन पाएका छैनन् । यसले यात्रुहरुलाई समस्यामा पारेको छ । कोत्रे नाकामा दर्जनौं यात्रुवाहक बस रोकिएका छन् र यात्रुहरु कोहि हिँडेरै गन्तव्यसम्म लम्किरहेका छन् भने कोहि बस चल्ने आशमा बसभित्रै बसिरहेका छन् । उनीहरु घण्टौंदेखि त्यहीँ रोकिएका छन् ।