पोखरामा रहेर क्रियाशील पत्रकारिता गर्दै आएका जगन्नाथ (गणेश) पौडेलको कोरोना संक्रमणका कारण निधन भएको छ । गण्डकी टेलिभिजनमा कार्यरत पौडेलको बिहीबार बिहान साढे ५ बजे गण्डकी मेडिकल कलेजमा निधन भएको हो । उनी गण्डकी टेलिभिजनका डाइरेक्टर तथा चर्चित कार्यक्रम गण्डकी छड्केका कोओर्डिनेटर हुन् । डेढ दशकदेखि पौडेल पत्रकारितामा सक्रिय रहँदै आएका थिए ।

पोखरा–३३, बागमारा निवासी ४१ वर्षीय पौडेललाई २० वैशाखमा कोरोना संक्रमण पुष्टि भएको थियो । कोभिडका कारण स्वास्थ्यमा समस्या आएपछि उनी ९ दिनदेखि गण्डकी मेडिकल कलेजमा नै उपचाररत रहेको पत्रकार पौडेलकी धर्मपत्नी कृष्णमाया पौडेलले जानकारी दिइन् । नेपाल पत्रकार महासंघ कास्कीका साधारण सदस्यसमेत रहेका पौडेलका आमा, श्रीमती र दुई छोरा छन् । कामप्रति बफादार र हक्की स्वभावका पौडेल २०६५ सालदेखि पत्रकारितामा लागेका हुन् ।

यसैबीच, नेपाल पत्रकार महासंघले पत्रकार पौडेलेको निधनले पत्रकारिता क्षेत्रमै अपूरणीय क्षती पुगेको बताए । केन्द्रिय समिति, गण्डकी प्रदेश समिति र कास्की जिल्ला समितिले छुट्टाछुट्टै विज्ञप्ति प्रकाशित गरी पत्रकार पौडेलको निधनप्रति दुःख व्यक्त गरेको छ । हालसम्म नेपालमा १२ जना पत्रकारको कोभिड संक्रमणका कारण ज्यान गइसकेको छ ।

महासंघका कास्की अध्यक्ष विमला भण्डारीले पौडेलको निधनप्रति दुःख प्रटक गर्दै परिवारजनमा समवेदना व्यक्त गरेकी छन् । साथै पौडेलको निधनप्रति पत्रकार तथा विभिन्न व्यक्तिहरुले सामाजिक सञ्जालमार्फत दुःख प्रकट गरेका छन् ।

महासंघका कास्की सचिव माधवप्रसाद बरालले नेपाल पत्रकार महासंघ कास्कीका सदस्य तथा गण्डकी टेलिभिजन पोखराका प्रबन्ध निर्देशक जगन्नाथ पौडेल ‘गणेश’ को असामयिक निधनले पत्रकार महासंघ कास्की मर्माहत भएको उल्लेख गरेका छन् ।

नेपाल पत्रकार महासंघ, गण्डकीका महासचिव गोविन्द सुवेदीले पौडेलको अल्पायुमै भएको असामयिक निधनले नेपाली पत्रकारिता क्षेत्रले एक कुशल र जुझारु युवा पत्रकार गुमाएको उल्लेख गरेका छन् ।