पोखरा । राष्ट्रिय जनमोर्चाले गण्डकी प्रदेशसभा सदस्य एवं पार्टीका केन्द्रीय सदस्य कृष्ण थापालाई साधारण सदस्य समेत नरहने गरी एक वर्षका लागि निलम्बन गरेको छ ।

शनिबार बसेको केन्द्रीय समिति बैठकले थापालाई केन्द्रीय समिति सदस्य लगायत सबै जिम्मेवारीबाट निष्काशन गरेपनि प्रदेश सभा सदस्यबाट भने हटाएको छैन । गण्डकीको संसदीय दलको नेताको जिम्मेवारीमा रहेका थापालाई काँग्रेस नेतृत्वको सरकार गठनका बेला असहयोग गरेकै बेला उक्त पदबाट भने हटाइसकेको छ ।

पार्टीका महासचिव मनोज भट्टले सञ्चारमाध्यमलाई जानकारी दिए अनुसार थापाले पार्टी निर्देशन उल्लंघन गरी पार्टीको प्रतिष्ठामा आँच पुर्याउने कार्य गरेकाले कारवाही गरिएको हो ।

पहिलो चरणमा पार्टी सदस्यबाटै निलम्बन गरिएको र आगामी दिनमा पुनः पार्टीको निर्देशन उल्लंघन गरिएको अवस्थामा सांसदबाट समेत हटाइने बताइएको छ । जनमोर्चाले पृथ्वीसुब्बा नेतृत्वको सरकार विस्थापनका लागि काँग्रेस, माओवादी, जसपाको गठबन्धनलाई सहयोग गर्ने निर्णय गरिसकेका बेला थापा भने पार्टी निर्देशन विपरित हस्ताक्षर गर्न अस्वीकार गरेका थिए ।

वैशाख १५ गते नै अविश्वास प्रस्तावको छिनोफानो हुने दिन राजमोकै अर्का सांसद खीमविक्रम शाहीका कारण काँग्रेसबाट प्रस्तावित मुख्यमन्त्री कृष्णचन्द्र नेपाली पोखरेल मुख्यमन्त्रीको कुर्सीमा आसिन हुन पाएनन् । फेरि वैशाख २९ गते बहुमतीय सरकार गठनमा कृष्ण थापा हस्ताक्षर नै नगरी बागलुङ हानिएका थिए । त्यसपछि विपक्षीले नयाँ सरकार गठन गर्न सकेन र राजिनामा दिएका मुख्यमन्त्री पृथ्वीसुब्बा गुरुङ पुनः कुर्सीमै फर्किएका थिए ।

गण्डकीमा सरकार बनाउन र ढाल्न जनमोर्चाका सबै ३ मत निर्णायक हुन्छ । दुई पटकसम्म एक–एक जना सांसदको साथ नमिलेपछि काँग्रेसका नेपालीको मुख्यमन्त्री बन्ने सपनामा तुषारापात भएको थियो । प्रदेशमा ६० सांसद रहेकामा मुख्यमन्त्रीका पक्षमा २८ मत छ । बहुमतका लागि ३१ मत चाहिन्छ ।