पोखरा । नेपाली फुटबलमा सर्वाधिक सफल फुटबल टीममध्येको एक मनाङ मस्र्याङ्दी क्लब (एमएमसी) ले पोखरालाई आफ्नो ‘होम ग्राउण्ड’ बनाउन गरेको प्रस्तावलाई राष्ट्रिय खेलकुद परिषद् (राखेप)ले सहमति प्रदान गरेको छ ।

क्लबको प्रस्तावलाई सहमति प्रदान गरेको खेलपाटीले न्यूज सार्वजनिक गरेको छ । राखेपको यो निर्णयसंगै मोफसलमा जाने मनाङ पहिलो क्लब बन्ने भएको हो ।

काठमाडौंलाई आधार बनाएर फुटबलमा लगानी गरिरहेको मनाङले पोखरालाई घरेलु मैदानको रुपमा विकास गर्ने प्रयास थालेको छ । मनाङ जिल्ला गण्डकी प्रदेशमा रहेकाले समेत पोखरालाई घरेलु मैदान बनाउनुपर्ने छलफल क्लबभित्र हुने गरेको थियो । क्लबमा नयाँ कार्यसमिति आएसंगै प्रक्रिया अघि बढेको हो ।

सम्झौता भएसंगै मनाङले राखेपबाट ‘होम ग्राउण्ड’को प्रमाणपत्र प्राप्त गर्नेछ । मनाङ र पोखरा रंगशालाबीचको विस्तृत सम्झौता राखेप अन्तर्गतको जिल्ला खेलकुद विकास समितिसंग हुने जनाइएको छ ।

लिग सहितका अन्य प्रतियोगिता मनाङले पोखरामै खेल्ने गरी करिब ५ वर्षलाई प्रारम्भिक रुपमा पोखरा रंगशालालाई घरेलु मैदानको रुपमा उपयोग गर्ने गरी मनाङले सम्झौताको तयारी गरेको छ ।