पोखरा। युरोकप र कोपा अमेरिका खेलमा सट्टेबाजी गरेको अभियोगमा कास्की प्रहरीले एक युवकलाई पक्राउ गरेको छ ।

लेकसाइडस्थित एक होटलमा बसेर भाइबर तथा ह्वाट्सएप मार्फत सट्टेवाजी गराईरहेको अवस्थामा पोखरा महानगरपालिका वडा नं -२७ तालचोक बस्ने १८ वर्षीय सुलभ सुवेदीलाई पक्राउ गरिएको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

हमालका अनुसार हाल जारी उक्त फुटबल प्रतियोगितामा पोखरामा पनि सट्टेवाजी भइरहेको भन्ने गोप्य सूचनाका आधारमा सोमबार जिल्ला प्रहरी कार्यालय कास्कीबाट खटिएको प्रहरीको टोलीले सुवेदीलाई पक्राउ गरेको हो ।

पक्राउ परेका सुवेदीमाथि सार्वजनिक हित स्वास्थ्य सुरक्षा सुविधा र नैतिकता विरुद्धको कसुर अन्तर्गत सट्टेवाजी गर्न नहुने मुद्धामा अनुसन्धान प्रकृया अगाडी बढाईएको प्रहरीले जनाएको छ भने, घटनामा संलग्न अन्य व्यक्तिको खोजतलास भईरहेको प्रहरीको भनाई छ ।