पोखरा । नेपाली कांग्रेस पोखरा महानगर समिति सभापतिमा सुरेन्द्रमान बिजुक्छे निर्वाचित भएका छन् । निकटतम प्रतिस्पर्धी गंगाधर पराजुलीलाई पराजित गर्दै उनी निर्वाचित भएका हुन् । बिझुक्छेले ४१४ मत ल्याउँदा गंगाधरले ३४६ मत पाए । गंगाधरसहित ५ प्रतिस्पर्धीलाई हराउँदै बिजुक्छे सभापति निर्वाचित भए ।

सभापतिका लागि रामराज लामिछाने, मिलन तिवारी, मोहन प्रसाद बास्तोला, ज्योति हमाल प्रतिस्पर्धामा थिए । मत परिणामको औपचारिक घोषणा भने हुन बाँकी छ ।

निवर्तमान उपसभापति समेत रहेका बिजुक्छे पोखरा उद्योग वाणिज्य संघका महासचिव हुन् । कांग्रेस पोखरा महानगर समितिमा कुल एक हजार ३७० मतदाता भएपनि नयाँ नेतृत्व चयनका लागि १३ सय ४४ मत दिएका थिए ।

उपसभापतिमा भवसागर बराल र प्रयागराज भण्डारी निर्वाचित भएका छन् । टुबराज बाँस्तोला र गणेशबहादुर थापा सचिवमा विजयी हुँदा संघर्ष कोइराला र सन्जय आले सहसचिवमा निर्वाचित भएका छन् ।

उपसभापति भण्डारीले पाँच सय ६९ र बरालले चार सय ६४ मत पाए । उपसभापति पदका लागि सात जनाको उम्मेदवारी परेको थियो ।

सचिव पदमा टुवराज बास्तोला र गणेशबहादुर थापा निर्वाचित भएका छन् । उनीहरूले क्रमशः आठ सय ५९ र सात सय ८९ मत पाए । सचिव पदमा उम्मेदवारीको दिएका सुरेन्द्रबाबु तिवारीले ६ सय २१ मत पाए ।

त्यस्तै, सहसचिव पदमा सङ्घर्ष कोइराला पाँच सय ८० मतसहित निर्वाचित हुँदा अर्को सहसचिवमा चार सय ६५ मतसहित सञ्जय आले निर्वाचित बने ।

यससँगै कास्कीका ५ स्थानिय तहमा काँग्रेसको नयाँ नेतृत्वको टुंगो लागेको छ ।

मादी गाउँपालिकामा यामप्रकाश गुरुङ सभापति निर्वाचित भएका छन् । देवीजंग गुरुङलाई १ मतले हराउँदै यामप्रकाश निर्वाचित भएका हुन् । देवीले ९२ मत पाउँदा यामप्रकाशले ९३ मत पाएका हुन् ।

माछापुच्छ्रे गाउँपालिका समितिको सभापतिमा वीरेन्द्र गुरुङ निर्वाचित भएका छन् । मधुसूदन अधिकारीलाई १५ मतले हराउँदै वीरेन्द्र सभापति निर्वाचित भएका हेन् । उनले ९१ मत पाउँदा मधुसूदनले ७६ मत पाए ।

अन्नपूर्ण गाउँपालिकामा मनपति भण्डारी सभापतिमा सर्वसम्मत चुनिएका छन् । उनको नेतृत्वमा समितिका सबै पदाधिकारी र सदस्यहरु सर्वसम्मत निर्वाचित भएका हुन् । उपसभापतिमा गौमाया नेपाली र सुशील भट्टचन निर्वाचित भए ।

रुपा गाउँपालिकामा पनि सर्वसम्मत सभापति चयन गरिएको छ । बिमलबाबु न्यौपानेको नेतृत्वमा गाउँपालिका समिति निर्विरोध चयन भएको हो ।