एभरेष्ट प्रिमियर लिग (ईपीएल) टी-ट्वान्टी क्रिकेटमा पोखरा राइनोजले जित निकालेको छ । टियु क्रिकेट मैदानमा सोमबार पोखराले काठमाडौं किङ्स-११ लाई डीएल पद्दतिको आधारमा १४ रनले हराएको हो ।

पोखरासँग हारसँगै काठमाडौंको प्लेअफ सम्भावना कठिन बनेको छ । काठमाडौं ४ खेलमा २ अंक जोडेर पाँचौं स्थानमा रहेको छ । अब प्लेअफमा पुग्न काठमाडौंलाई अन्तिम खेल जित्नै पर्ने भएको छ । पोखरा भने यस अघि नै प्लेअफ पुगिसकेको छ । दोस्रो स्थानमा उक्लिएको पोखराले ५ खेलमा ७ अंक जोडेको छ ।

काठमाडौंले दिएको १ सय ८३ रनको लक्ष्यसहित जवाफी ब्याटिङ गरेको पोखराले १५ ओभरमा ५ विकेट गुमाएर १ सय ४२ रन जोडेको थियो ।पोखरालाई जितको लागि ३० बलमा ४१ रन आवश्यक परेको अवस्थामा वर्षाले खेल रोकिएको थियो । त्यसपछि खेल पुन: सुरु भएन र डीएलको आधारमा पोखराले जित निकालेको हो ।

वर्षाले खेल रोकिनु अघि पोखराका सहन अर्चाचिगेले ४३ रन बनाए। विवेक यादव ४१ रनमा अविजित रहदा लोकेश बम १८ रनमा अविजित रहे । रिचार्ड लेभी १७ रनमा आउट भए ।

काठमाडौंका जितेन्द्र मुखिया र गुलशन झाले २/२ विकेट लिए । यस अघि टस हारेर पहिले ब्याटिङ गरेको काठमाडौंले २० ओभरमा ८ विकेट गुमाएर १ सय ८२ रन बनाएको थियो ।

काठमाडौंका लागि अमित श्रेष्ठ र रायन बुर्लले अर्धशतक बनाए । अमितले ४१ बलमा ५६ रन जोड्दा दुई छक्का र ६ चौका प्रहार गरे । बुर्लले ४३ बलमा ५० रनको योगदान गरे । उनले तीन छक्का र दुई चौका हिर्काए ।

कप्तान सन्दीप लामिछानेले ३१ रनको योगदान गरे । ११ बल खेलेका लामिछानेले तीन छक्का र दुई चौका हाने । रहमानुल्लाह गुर्बाज १२, अमर रौटेला ७, असान प्रियन्जन ५, सुवास खकुरेल २ रन र राजु रिजाल शुन्य रनमा आउट भए । गुलशन झाले एक रन जोडे ।

पोखराका लागि विवेक यादवले सर्वाधिक तीन विकेट लिए । सहन अर्चाचिगे, बिक्रम सोब, नन्दन यादव र किशोर महतोले एक-एक विकेट लिए ।