काठमाडौं : कर्णाली प्रदेशका मुख्यमन्त्री महेन्द्रबहादुर शाहीले बुझाएको राजीनामा प्रदेश प्रमुख गोविन्दप्रसाद कलौनीले स्वीकृत गरेका छन्।

सोमबार साँझ मुख्यमन्त्री तथा मन्त्रिपरिषद्को कार्यालयबाट प्रदेशबासीका नाममा सम्बोधन गर्दै उनले दिएको राजीनामा सोमबार साँझै प्रदेश प्रमुखसँग भेटी बुझाएका हुन्।

कलौनीले राजीनामा बुझे लगत्तै स्वीकृत गरेको प्रदेश प्रमुख कार्यालयले जनाएको छ। शाहीले ३ वर्ष ८ महिना कर्णाली सरकारको नेतृत्व गरी सरकारबाट बाहिरिएका हुन्। अब नेपाली कांग्रेस संसदीय दलका नेता जीवनबहादुर शाही कर्णालीको मुख्यमन्त्री बन्ने छन्।

प्रदेश प्रमुखद्वारा मुख्यमन्त्रीमा दाबी पेस गर्न आह्वान

कर्णाली प्रदेश प्रमुखले मुख्यमन्त्रीमा दाबी पेस गर्न आह्वान गरेका छन्। मुख्यमन्त्री शाहीले राजीनामा दिएपछि प्रदेश प्रमुख कलौनीले नयाँ सरकार गठनका लागि मुख्यमन्त्रीमा दाबी पेस गर्न आह्वान गरेका हुन्।

प्रदेश सभामा कुनै पनि दलको स्पष्ठ बहुमत नरहेकाले मुख्यमन्त्री कलौनीले संविधानको धारा १६८ को उपधारा (२) बमोजिम दुई वा दुईभन्दा बढी दलहरुको समर्थनमा बहुमत प्राप्त गर्नेसक्ने प्रदेश सांसदलाई सरकार गठनका लागि दाबी पेस गर्न आह्वान गरेका हुन्।

प्रदेश प्रमुख कलौनीले मुख्यमन्त्रीमा दाबी पेस गर्नका लागि २४ घण्टा (मंगलबार राति ७ बजेसम्म)को समय दिएका छन्। कर्णालीमा नेकपा माओवादी केन्द्र नेतृत्व सरकारका मुख्यमन्त्री शाहीले गठबन्धनको अर्को दल नेपाली कांग्रेसलाई सरकार गठन गर्नका लागि राजीनामा दिएका हुन्।